El CEE aprueba la creación de la especialidá de Llingua Asturiana

Esta entrada está disponible en: Castellano (Castellanu)

Periodicu ESCUELA, nº 4033  del 2 d’ochobre:

El Conseyu Escolar del Estáu aprueba la creación de la especialidá de Llingua Asturiana

42 votos a favor dan tamién lluz verde a la implantación d’un plan de choque contra la violencia de xéneru nel ámbitu educativu

El Conseyu Escolar del Estáu aprobó, la selmana pasada, la creación de la especialidá docente de Llingua Asturiana, una vieya reivindicación de diversos grupos de la comunidá autónoma allegaos y simpatizantes del movimientu asturianista. Dempués de dalgún intentu fallíu nel pasáu, nesta ocasión la propuesta sacó l’apoyu mayoritariu del órganu estatal nel que s’atopa representada la comunidá educativa –profesores, families y alumnáu– con 34 votos a favor, 26 en contra y 6 astenciones, una resultáu especialmente prestosu pal Sindicatu Unitariu y Autónomu de Trabayadores de la Enseñanza d’Asturies (SUATEA), impulsor de la iniciativa que defendió la so conseyera, Beatriz Quirós, dientro de les propuestes de meyora presentaes al informe añal sobre l’otru cursu escolar.

Una y bona algamada l’aprobación per parte del Conseyu Escolar del Estáu, el siguiente pasu ye’l treslláu d’esti encamientu al Ministeriu pa dar na so aplicación, anque  SUATEA confía en que nun hebia problemes nesti puntu y esti determín signifique “igualar al alumnáu de la comunidá autónoma y al profesoráu qu’imparte Llingua Asturiana nel so ámbitu col restu de llingües propies o oficiales del Estáu”, esplica’l sindicatu nun comunicáu. De ser asina, esta midida supondría, ente otres coses, que los maestros de Llingua Asturiana, qu’hasta’l momentu cunten con un certificáu de capacitación pa impartir  l’asignatura, d’equí en delantre podríen optar a una oposición y equiparase na función pública a los profesionales d’otres especialidaes docentes.

Coles mesmes, el Conseyu Escolar del Estáu sofitó tamién una propuesta de SUATEA venceyada a la necesidá d’enllantar nel ámbitu educativu un plan de choque contra la violencia de xéneru, con 42 votos a favor, 20 en contra y 7 astenciones. La suxerencia recueye la conveniencia de cuntar con un esfuerzu presupuestariu per parte del Ministeriu d’Educación pal desenvolvimientu de programes de coeducación nos centros, asina como la puesta en marcha nes distintes alministraciones educatives de formación específica, tanto inicial como permanente, pa tol profesoráu, en rellación cola prevención de la violencia contra les muyeres.

Print Friendly, PDF & Email

Esta entrada está disponible en: Castellano (Castellanu)