Concentración de la Xunta de Personal

Los sindicatos de la Xunta de Personal Docente convocamos esta concentración énte la necesidá de responder a les actuaciones de la Conseyería d’Educación que sigue agravando les condiciones llaborales del profesoráu asturianu.

Resulta intolerable qu’una alministración en funciones tea de contino regulando midíes alministratives, per aciu de la publicación nel BOPA, y publicando circulares sobre cuestiones con implicaciones llaborales decisives ensin nengún tipu de negociación colos representantes del profesoráu.

Los sindicatos docentes vemos alarmante lo que ta pasando: que los asuntos qu’urxen y que son indispensables pal funcionamientu de los nuestros centros educativos tean paralizaos. Siguimos a la espera del calandario d’actuaciones de fin de cursu, onde se ponen les feches de peticiones de los distintos colectivos de funcionarios, siguen pendientes de resolver les comisiones de serviciu, el currículu de Secundaria y Bachilleratu nun se publicó tovía, la continuidá nes llistes del profesoráu interín ta nel aire y la garantía del derechu del alumnáu a la evaluación continua en setiembre ta en cuestión.

En cambiu, la Conseyería usa toles sos enerxíes en publicar resoluciones qu’afecten enforma a las condiciones llaborales del profesoráu. Regula un programa de préstamu y reutilización de llibros de testu controvertíu dafechu, insuficiente económicamente y desreguláu dende’l puntu de vista llaboral. Y, amás, atrévese a sobrecargar nel llombu del profesoráu tou tipu d’actuaciones farmacoterapéutiques, lo que vemos, cuanto menos, temerario.

A estes cuestiones xúntase’l procesu de planificación de plantiyes docentes pal cursu que vien. La propuesta de l’alministración ta dando llugar a la perda d’abondos puestos de trabayu, a la insólita minoración de la plantiya publicada nel BOPA el 21 d’abril y a una cobertura insuficiente y alloñada de les necesidaes reales de los centros.

Fueron inútiles tolos argumentos remanaos delantre l’alministración na xunta fecha l’otru llunes. El pidimientu de retirada de resoluciones como la de préstamos de llibros o la de salú nos centros educativos nun van ser teníes en cuenta y los representantes sindicales tamos siendo fechos de menos a la d’axustar cuestiones qu’afecten directamente a les funciones que como docentes exercemos nos centros.

D’una forma maliciosa inténtase confrontar los intereses de les families y les nuestres demandes, cuando la realidá ye que coles nuestres reivindicaciones tamos contribuyendo de manera directa a la meyora d’un serviciu públicu fundamental. La necesidá de configurar un sistema de gratuidá nos materiales escolares o asegurar una correcta asistencia sanitaria cola presencia del personal especializáu necesariu son cuestiones esenciales pa garantizar una enseñanza curiosa y integradora. Tienen de ser trataes de forma colectiva, con participación y debate, en busca de soluciones que vaigan acullá d’un titular de prensa o del voluntarismu de les persones arreyaes pa que nun se dean incidentes que tengamos que llamentar más tarde.

Por too ello esiximos a l’alministración educativa que se replantegue estes cuestiones y s’avenga a negociar realmente colos representantes de los trabayadores y que favoreza la meyora del sistema educativu al empar que contribúi a la criación d’empléu nuna comunidá tan castigada como la nuestra.

CONTRA’L RETAYU DE PLACES EN PLANTIYA

POR UNA XESTIÓN EFICIENTE DEL BANCU DE LLIBROS

CONTRA’L MEDICAMENTAZU

POR MEYORES CONDICIONES LLABORALES