Home > Comunicaos > SUATEA y el restu d’organizaciones sindicales abandonen la Mesa Sectorial d’Educación

SUATEA y el restu d’organizaciones sindicales abandonen la Mesa Sectorial d’Educación

 Énte l’aventadura de l’’alministración na convocatoria d’U.E.P.

 Pesie a la petición de SUATEA y el restu de sindicatos, l’Alministración manifestó la so intención de mantener la UEP y facer la convocatoria nesti cursu.

Esta mañana l’Alministración anunció un aumentu de places docentes a ufiertar, pasando de les 39 qu’anunciaren primero a 51. La razón qu’apurren ye qu’interpretaren mal la fórmula que’l gobiernu central define p’afitar la tasa de reposición, yá que si bien a lo primero tuvieren en cuenta al profesoráu que se movió pel concursu de tresllaos nacional, paez ser qu’esto nun yera asina.

Les especialidaes que sufren modificaciones nel númberu de places ufiertaes son estes:

Especialidaes Xuba de places
Hostelería y turismu De 4 a 6
Cocina y pastelería De 5 a 7
Mantenimientu de vehículos De 4 a 5
Procedimientos sanitarios y asistenciales De 4 a 5
Servicios a la comunidá De 2 a 8

SUATEA denunció na mesa sectorial que’l Gobiernu asturianu ta utilizando esta UEP como una midida populista. Paez que la Conseyera d’Educación pretende facer méritos nel PSOE a nivel estatal emprestándose  al xuegu del so partíu col envís de facer un llaváu d’imaxe nel que s’intenta  comencer a la opinión pública de que la so defensa de los de los servicios públicos estrémalos del PP.

Esti xuegu, que quiciabes tapeza aspiraciones personales, obliga a sacrificar necesariamente al profesoráu interín asturianu que lleva, en munchos casos, más de 15 años de servicios y al conxuntu de los titulaos asturianos qu’engorden les llistes del paru, yá que tanto unos como otros tendrán que competir col restu d’aspirantes que vendrán en masa del restu de comunidaes autónomes pol efectu llamada qu’esta ufierta supón pa territorios nos que nun hai oposición. D’otru llau les places del conservatoriu de promoción interna podrán ser cubiertes por profesoráu funcionariu de carrera proviniente d’otres comunidaes, polo qu’un bon númberu d’interinos van dir a la cai.

Pero estos ruinos defensores de los servicios públicos nun dulden d’otru llau en baltar la escuela pública asturiana achuquinando, en dellos casos, unidaes d’infantil de 3 años n’escueles que casualmente tán allugaes mui cerca de centros concertaos. Con esta estratexa la señora Conseyera ye a esmantelar dende abaxo a centros públicos en porgüeyu de la concertada al más estilu PP. Estes son les contradicciones, interesaes o non, de la nuestra señora Conseyera.

SUATEA desixó-y a esti Gobiernu un apueste pola escuela pública y que se pare nos retayos de plantiyes docentes y tamién alertó sobre la destrucción d’empléu que supondría la convocatoria d’ufierta pública d’empléu ente los docentes interinos asturianos, yá que’l restu de comunidaes nun convoquen oposiciones y l’efectu llamada ta garantizáu. SUATEA perafitóse na so propuesta igual que’l restu d’organizaciones de reservar les places convocaes pa los próximos años.

Asinamesmo, SUATEA denunció’l perxuiciu pal profesoráu funcionariu interín y funcionariu de carrera que güei trabaya nos conservatorios de música coles places de cátedra yá qu’estes puen cubrise por funcionarios de carrera de fuera de la comunidá.

Pa rematar, SUATEA perafitóse na so desixencia de que’l Gobiernu asturianu protexa l’empléu n’Asturies y nun contribuya a facer medrar les escandaloses cifres de paru qu’hai na nuestra comunidá.

 Secretariáu de SUATEA

Uviéu, 18 de febreru de 2014

Esta entrada tamién se puede consultar en: Castellanu