SUATEA | Sindicatu Unitariu Autónomu de Trabayadores de la Enseñanza d'Asturies educación, asturias, educastur, oposiciones, enseñanza, marea verde, pública, escuela, colegio, instituto, interinos,
Esta entrada está disponible en: Castellano (Castellanu)
Mesa de negociación MEyFP:
ANTEPROYECTU DE LLEI DE CAMBÉU DE LOE/LOMCE
SUATEA/STEs-i reclama al Ministeriu d’Educación la participación real del profesoráu na negociación de la futura llei educativa.
A pesar de trescurrir seis meses dende la formación del nuevu gobiernu de Pedro Sánchez, hasta’l día de güei la ministra Isabel Celaá nun convocara tovía la mesa sectorial de negociación d’Enseñanza Pública non universitaria.
El puntu únicu de la xunta foi l’anteproyectu de Llei Orgánica de cambéu de la LOE. STEs-i valoró positivamente la introducción de la disposición derogatoria de LOMCE, en rempuesta a la demanda educativa y social, pero alvirtió al Secretariu d’Estáu, Alejandro Tiana, que si la futura llei llega a establecese ensin el consensu de la comunidá educativa de la Escuela Pública, va tener la so caducidá asegurada.
El sindicatu criticó’l fechu de poner sobre la mesa’l borrador lexislativu en plenes elecciones sindicales, lo que torgó hasta’l momentu un alderique asambleariu que permita la participación real del profesoráu na negociación. Amás, los plazos marcaos pal alderique nel Conseyu Escolar del Estáu, anque se prorogó hasta’l 8 de xineru, son demasiao curtios y tendría d’implementase tamién un calendariu de negociación real na mesa sectorial.
Al respeutive’l cambéu de LOE/LOMCE, STEs-i (qu’integra a SUATEA) manifestó la necesidá d’una Llei de Financiamientu complementaria qu’asegure la Educación Púbica y avance na meyora de la inclusividá educativa, l’atención personalizada y l’igualdá d’oportunidaes del alumnáu, que s’aprecie nos próximos Presupuestos Xenerales del Estáu.
Tamién pa esto ye meneste ameyorar les condiciones llaborales del profesoráu y entamar cuestiones tan urxentes como l’afitamientu llaboral del profesoráu interín, lo que rique replantegar el sistema d’accesu a la función docente, o caltener la xubilación anticipada, pa lo que’l ministeriu se comprometió a pautar un calendariu de negociaciones a partir de xineru.
La Confederación de STEs-intersindical insiste na necesidá d’una negociación participativa y real que tenga en cuenta les posiciones del profesoráu y los intereses de la Escuela Pública.
Secretariáu de STEs-intersindical
12 d’avientu de 2018
Esta entrada está disponible en: Castellano (Castellanu)
