Analís de qué?

Güei celebróse una xunta na Conseyería d’Educación con un únicu puntu nel orde del día: “Analís de los criterios pa la determinación de les places por especialidá derivaes de la Ufierta Pública de Estabilización d’Empléu Temporal del 2022.”

Yá la ufierta d’empléu públicu estraordinaria pa la estabilización d’empléu temporal del personal docente n’aplicación de la llei 20/2021, alcordada pola alministración pública asturiana y les organizaciones sindicales UXT, CCOO y CSIF, foi risible y restorcida. Per un lláu, nun especificaba cola mesma claridá’l númberu de puestos per especialidá y, per otru, resalvaba pa Educación el lliteral de la llei a la de contabilizar o identificar les places que teníen d’ufiertase por aciu’l sistema de concursu de méritos. De tal manera que, ensin saber cuántes places teníen de computase de cada especialidá, pudieren calcular el númberu total de places per cada cuerpu docente.

A esa paradoxa aritmética, güei tenemos que sumar la nuesa perplexidá pola falta de criterios sol númberu, especialidá y cuerpos de les places correspondientes al concursu de méritos procedentes de les disposiciones adicionales sesta y octava yá que la propuesta que se nos presenta nun s’afai a lo recoyío nel Alcuerdu de 27 de mayu de 2022 ( BOPA de 31 de mayu).

Dende SUATEA nun podemos más que ratificar lo que yá venimos manifestando dende l’entamu d’esti procesu: que nun estabiliza a persones sinón delles places, y que nun esiste voluntá de desquitar del abusu al personal interino, nin si quiera de faer cumplir la llei tocantes a la ufierta pública d’estabilización.

Esiximos a la Conseyería d’Educación claridá y tresparencia nel analís de les places ufiertaes, en cuenta d’esta opacidá y falta de rigor a la que nos tienen sometíos. Ye lo mínimo que puede pidise como amuesa de respetu pal personal interino docente non universitariu, énte la indefensión na que s’atopa, a mercé de continuos cambeos de criteriu.

Una vegada más, la mesma Alministración corrixe los sos datos cuando nun pasaron nin dos meses de la presentación de los mesmos.

A última hora, nun podemos más que denunciar l’acosu y valtamientu al que se ve sometíu’l profesoráu de la nuesa comunidá del qu’esta alministración abusó añu tres d’añu, guardándo places (a sabiendes) nes ufiertes de concursu oposición, yá que prefier utilizar al profesoráu en situación d’interinidá como fiches de quita y pon qu’utiliza al so antoxu.