Home > Comunicaos > Amenorgamientu d’hores llectives: ceremonia del tracamundiu

Amenorgamientu d’hores llectives: ceremonia del tracamundiu

Amenorgamientu d’hores llectives
del profesoráu asturianu: ceremonia del tracamundiu

La llegada al poder del PSOE de Pedro Sánchez abrió un ciclu políticu nuevu marcáu pola esperanza d’acabar cola política de retayos impulsada pol Partíu Popular. Nel ámbitu educativu falar de la derogación del RD impuestu por Wert y Montoro que significaron verdaderu hachazu a la Escuela Pública. Trescurríos daqué más de cuatro meses, les esperances empiecen a esmorecer.

La Confederación sindical STES (a la que pertenez SUATEA) alerta énte’l peligru que supon el que Gobiernu central nun ta adoptando nenguna midida presupuestaria que garantice dar pasos concretos nel sentíu de facer recular los retayos. L’Alcuerdu de Presupuestos Xenerales del Estáu presentaos polos Secretarios xenerales del PSOE y Podemos nun dedica nengún aumentu significativu nel gastu d’Educación que dexe a les CCAA menguar les ratios d’alumnáu per aula o les hores llectives del profesoráu.

Esti parón va tener ensin dulda consecuencies na situación de la Escuela Pública asturiana. El pasáu mes de setiembre rompió la unidá sindical na Mesa Sectorial de negociación cuando ANPE y UXT refugaron la propuesta presentada pola Conseyería d’Educación na Mesa Sectorial que permitía cerrar un alcuerdu pa restablecer les 18 hores lectives en Secundaria y reorganizar dos hores complementaries nel horariu de Primaria. Anque la propuesta foi calificada d’insuficiente per parte de SUATEA, entendimos que, nun escenariu políticu volátil como‘l d’anguaño, permitía asegurar una reivindicación central como ye la naguada torna a les 18 hores y entamaba la reorganización horaria en Primaria y facilitaría l’apertura d’un procesu de negociación posterior que dexaría encetar otros aspeutos tamién rellacionaos con hores llectives como l’amenorgamientu pal profesoráu mayor de 55 años, el cumplimientu del Alcuerdu de Plantiyes en Primaria y Educación Infantil o l’amenorgamientu a 23 hores llectives en Primaria ya Infantil.

Quien refugaron la propuesta dedíquense a tresmitir un mensaxe de “tranquilidá al profesoráu asturianu” que los fechos desmienten acaldía. El Real Decretu nun foi entá derogáu y, cuando eso asoceda, ábrese la vía pa que cada Comunidá Autónoma regule la nueva situación como crea menester colo qu’el restablecimientu de les condiciones llaborales anteriores a la crisis económica nun va ser automáticu nin inmediatu.

Nel casu d’Asturies vimos que dende la Conseyería remana un abanicu ampliu de posibilidaes que nun asegura, nin tanto, esa torna inmediata que quieren faenos creer los sindicatos non firmantes.

Too esto llévanos a reiniciar les movilizaciones del profesoráu p’algamar les 18/23 hores llectives pal profesoráu. Nesa llinia participamos na convocatoria conxunta d’un enzarru que va tener llugar el día 17 nel IES Mata Xove de Xixón, vamos emburriar les concentraciones nes puertes de los centros de Secundaria’l día 18 y en Primaria’l día 23, amás vamos tar nel plantón de delegaos y delegaes sindicales el mesmu día 18 énte la Conseyería.

Nada tenemos algamao nin asegurao. Solo calteniendo la movilización vamos poder garantizar que la resultancia de l’actual situación caiga pal próximu cursu 2019-2020 pa escontra la supresión inmediata de les hores estra añedíes pol gobiernu anterior.

El secretariáu de SUETEA

Uviéu, 16 ochobre 2018

Esta entrada también está disponible en: Castellanu


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 3743

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 3743