Home > Profesoráu > Profesoráu interín > Alcuerdu d’interinidá: mayor precariedá

Alcuerdu d’interinidá: mayor precariedá

Ayer 3 de xunu, l’Alministración reunióse colos sindicatos firmantes del alcuerdu de profesoráu interín (ANPE y UGT) pa tratar d’esclariar determinaos aspectos del mesmu que dexen en total indefensión a un gran númberu d’aspirantes. Esti alcuerdu tien como fin principal facer una llimpieza de llistes, dexando a cientos de persones qu’hasta agora formaben parte d’elles ensin posibilidá de siguir nes mesmes, entá teniendo aprobao en procesos anteriores.
Vista dalguna información publicada paez que les resultancies de la reunión son inoperantes dafechu y nun igüen nengún de los problemes qu’afecten a esti colectivu. Resulta qu’estos sindicatos danse cuenta agora de lo nefasto del alcuerdu pa quien se presente al procesu selectivu qu’empieza’l próximu día 22. ¡Llamentable!
EL fechu d’obligar a presentase a les oposiciones xenera situaciones rocambolesques, de les que yá avisamos daquella y que mos fixeron llantar cara a l’Alministración con delles movilizaciones en contra del alcuerdu.
L’alcuerdu ye perxudicial pa la inmensa mayoría aspirantes pues lo que l’Alministración persigue ye que tean nuna sola llista y polo tanto pierdan oportunidaes de trabayar. Esto choca frontalmente cola política qu’apliquen nos centros onde utilicen la premisa de “toos pa too”, obligando a que los especialistes exerzan les tutoríes que correspuenden a la especialidá de Primaria, y incumpliendo asina reiteradamente los alcuerdos sindicales. Esto solo ye una amuesa más de la incoherencia d’esta Conseyería, onde s’apliquen distintos criterios énte fechos asemeyaos y del despreciu de la mesma y d’eses organizaciones sindicales pa col profesoráu interín.

Esta entrada tamién se puede consultar en: Castellanu