Alcuerdu 18 hores: Un primer pasu pa siguir lluchando

Esta entrada está disponible en: Castellano (Castellanu)

El profesoráu asturianu, anque aunque condicionáu pola derogación per parte’l Ministeriu d’Educación del RD 14/2012, yá tien un Alcuerdu enriba la mesa que-y garantiza la vuelta a les 18 hores el cursu qu’entra. Foi una llarga llucha del profesoráu, con declaraciones y movilizaciones qu’inclusive llevaron esta reivindicación al Parlamentu asturianu en delles ocasiones.

Dende SUATEA llamentamos qu’ello nun fuera posible nel mes de setiembre pola mor del refugu d’UGT y d’ANPE. La irrupción, en plena campaña ellectoral, de la Conseyería con una propuesta que nun concreta más meyores tanxibles que les espuestes con anterioridá, da pie a instrumentalizaciones polítiques que nada tienen que ver colos intereses reales del profesoráu.
Esti alcuerdu yera menester roblalu porque dende los centros nun s’entendería que diéremos el llombu a la posibilidá d’acabar con una situación penosa que deteriora la calidá educativa. Por fin entendiéronlo tamién los sindicatos qu’agora rectificaron. El refugu del profesoráu contra quien atayaron en septiembre l’Alcuerdu sobre les hores lectives, fizo que nesta ocasión sí se llograra la unanimidá.

Nun hai meyores significatives más allá de lo conocío: la vuelta a les 18 hores en Secundaria y el cómputu mensual de dos hores complementaries en Primaria. Somos conscientes de que’l restu de cuestiones que se punxeron enriba la mesa son dafechu inconcretes, ensin oxetivos nin compromisos más allá de facer grupos de trabayu que funcionaríen na próxima primavera. Sin embargu fueron el pretestu p’algamar la unanimidá na Mesa Sectorial de negociación. Volver a les 18 lectives ye importante, pero amargoso nel sen de que too sigue pendiente d’una negociación real: l’amenorgamientu del horariu pa mayores de 55, les ratios, la sustitución darreu de les baxes, l’incumplimientu de los alcuerdos de Plantiyes, les hores llectives en Primaria, la estabilidá del profesoráu interín, etc. Eso sí, agora toos vamos ser quien esfrutar del “nuesu carné docente”.

Esperamos que, dempués de cuatro años marcaos pola negativa de la Conseyería d’Educación a negociar nengún asuntu propuestu polos sindicatos, esti primer pasu sirva pa empecipiar otru periodu distintu, con otra predisposición, que traiga dalgún frutu y nun se quede nun “posturéu” de cara a les elecciones lexislatives que llueu vamos vivir.

Uviéu, 27 de payares de 2018

Print Friendly, PDF & Email

Esta entrada está disponible en: Castellano (Castellanu)