Home > Comunicaos > Acabada la lexislatura, Educación apauta cola Ilesia in extremis

Acabada la lexislatura, Educación apauta cola Ilesia in extremis

SUATEA, el Movimientu Social Pola Escuela Pública d’Asturies (MSEPA) y Asturies Laica denuncien que’l Conseyeru d’Educación en funciones, Genaro Alonso, cierra’l so mandatu cola firma d’un conveniu de collaboración ente la Conseyería d’Educación y la Facultá Padre Ossó, entidá privada qu’imparte, ente otros, estudios de Maxisteriu y que ta venceyada a la ilesia. El conveniu supón que la entidá privada va poner a disposición de los centros educativos públicos y concertaos un terapeuta ocupacional y un educador social a partir del próximu cursu y por un periodu de cuatro años. Aseguren qu’estes nueves figures van ocupase de los problemes del alumnáu d’Infantil y Primaria en tolo rellacionao con acosu escolar, bullying, conductes  racistes, inclusión d’alumnáu con discapacidá, etc.

SUATEA, el MSEPA y Asturies Laica denuncien la zorramplería y la desinformación colos que se llevó a cabu esti asuntu y, amás, qu’un conseyeru en funciones tenga l’atrevimientu de roblar un conveniu de cuatro años que tendrá d’alministrar quien lu asoceda.

Tocante al conteníu del conveniu, ye sorprendente que’l Conseyeru recurra a una entidá privada y confesional pa que-y apurra profesionales qu’ayuden a atayar los problemes de relaciones del alumnáu. Na enseñanza pública hai profesoráu formao y esperto, dalguno d’ello referente a nivel de tol Estáu, nel tratamientu d’esti tipu de problemátiques, especialmente n’igualdá de xéneru, xenofobia, homofobia, etc.  y son profesionales de la educación que trabayen davezu con tou tipu d’alumnáu y andechando colos equipos docentes y equipos directivos. La Conseyería tendría de cuntar con esti profesoráu que yá ta formao y entamar un plan o programa institucional que promueva la Igualdá ente homes y muyeres, que prevenga la homofobia, l’acosu, la xenofobia, etc. y en concencia, non delegar esta responsabilidá nuna entidá privada que va apurrir unos profesionales ayenos al ámbitu educativu. Sía que non, si realmente consideren necesario que los centros cunten con Terapeutes Ocupacionales y Educadores Sociales, la conseyería tendría de crear estes places y sacales a concursu-oposición.

Per otru llau, el conveniu cola entidá relixosa y privada inclúi un compromisu d’ “afondar” na formación del profesoráu y el desenvolvimientu de programes d’innovación ya investigación. Choca que nos postreros diez años asistimos al esmantelamientu de la rede de Centros de Formación del Profesoráu (CPRs) y que nesti momentu namá esisten cuatro centros n’Asturies (Uviéu, Xixón, Avilés y Cuenques). Cerráronse tolos CPRs de les zones de la periferia (Llanes, L.luarca, Cangas del Narcea, etc.) y oblígase al profesoráu d’estes zones a recibir formación  n’horariu de tarde y en centros bien alloñaos del so centru de trabayu. Nun ye de recibu que se roble un conveniu de formación del profesoráu con una entidá privada, qu’ensin dulda va sacar tayada a costa del dineru público, en vez de reforzar  la rede de Centros públicos de Formación del Profesoráu (CPRs), que son necesarios y bien demandaos pol personal docente.

N’Uviéu a 21 de xunu de 2019.

EL Secretariáu de SUATEA, el Movimientu Social Pola Escuela Pública d’Asturies (MSEPA) y Asturies Laica.

Esta entrada también está disponible en: Castellanu


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4344

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4344