Abusu de temporalidá – Abogacía Xeneral del TJUE

SUATEA valora les Conclusiones de l’Abogacía Xeneral del Tribunal de Xusticia de la Unión Europea sobre l’abusu de temporalidá del personal interino.

El pasáu 17 d’ochobre, conociéronse les Conclusiones de l’Abogada Xeneral del Tribunal de Xusticia de la UE, Sra. Julian Kokoit. Trátase d’un informe previu a la sentencia, que va retrasase unos meses más. Magar ye verdá que los medios de comunicación centraron les sos informaciones nuna de les conclusiones de dichu informe, según la que “la cláusula 5 del Alcuerdu Marcu nun s’opón a la xurisprudencia de los tribunales nacionales según la que l’usu abusivu de los socesivos nomamientos temporales per parte de l’Alministración pública nun se sanciona automáticamente cola tresformación de la rellación de serviciu temporal nuna rellación de serviciu fixu”, poner namás el  focu ehí ye facer una interpretación parcial d’un informe de más de 30 páxines y munches considerancies.

Nes conclusiones reconózse claramente l’abusu xeneralizáu de la contratación temporal, lo que tendría de ser correxío “por un mecanismu de sanciones efectivu y disuasoriu”. L’abogada xeneral ye bien crítica coles actuaciones tanto de les autoridaes alministratives como xudiciales españoles, que cola sida de que la llei dexa’l nomamientu de funcionariáu interino, permitió la cobertoria de puestos y necesidaes nes distintes Alministraciones que nun teníen calter nin escepcional nin provisional, sinón ordinariu y permanente.

Tamién establez que los procesos d’estabilización y d’accesu llibre nun son una midida sancionadora que cumpla cola directiva 1999/70 de la Comunidá Europea y, poro, nun son mecanismos abondos para sancionar los abusos cometíos poles Alministraciones Públiques nel fraude a la temporalidá, magar que los distintos firmantes del Alcuerdu d’Estabilización nun se consideraron siquier mínimamente aludíos, yá que mos lo vendieron como la fórmula a tolos males del personal n’interinidá.

Verdaderamente la Directiva europea nun impón la tresformación de la relación temporal nuna relación fixa, si nel estao miembru esisten otros mecanismos sancionadores a les Alministraciones responsables del abusu. Pero para l’abogacía xeneral nun sedría bastante, como establez el TS na so sentencia de 26 de setiembre de 2018, que la sanción énte l’abusu consistiera nel caltenimientu del empléu hasta la so cobertoria per aciu los correspondientes procesos selectivos, lo que considera bastante, porque esta midida tendría de dir acompañada d’una indemnización completa de los perxuicios que causara l’abusu y estes indemnizaciones tienen de dir acompañaes d’un mecanismu de sanciones efectivu y disuasoriu. 

Tamién destacamos que nun ye requisitu pa una posible reclamación, de ser el casu, tenelo reclamao primero, tal como defendieron dellos promotores d’iniciatives. El fechu de que’l funcionariáu interino nun impugnara los sos nomamientos y ceses nun torga que tenga d’aplicáse-y la directiva 1999/70 y, polo tanto, que tenga los efectos que procedan en derechu.

A lo último, recordar que SUATEA presentó demanda xudicial  reclamando que se reconoza’l calter fixu del personal interino docente que lleven más de trés años encadenando contratos en situación de continuidá abusiva.  SUATEA ta pendiente de que los tribunales se pronuncien sobre la so demanda, que, dependiendo del como trescurran los tiempos procesales, podría vese afectada pola sentencia del TJUE, que inevitablemente van esplegar los sos efectos sobre tolos operadores xurídicos.

Sía que non, como venimos faciendo dende va tiempu, encamentamos nuevamente, con prudencia, esperar al resultáu de la sentencia del TJUE, que nun se dio tovía. El testu del informe ye por demás densu en conteníos y les informaciones en medios de comunicación nun fueron al fondu del informe. L’informe ye categóricu contra l’abusu de temporalidá, situación qu’asitia como contraria a derechu, siendo esi unu de los aspeutos más relevantes y positivos, al dicir claramente qu’esa regla nun puede siguir perpetuándose na Alministración española.