A vueltes coles oposiciones, Sr. Conseyeru ¡esclarie!

Esta entrada está disponible en: Castellano (Castellanu)

SUATEA ESIXE A L’ALMINISTRACIÓN UNA XUNTA URXENTE PA ESCLARIAR L’ACTUACIÓN DE LA CONSEYERÍA D’EDUCACIÓN  FRENTE A LES OPOSICIONES DOCENTES

 

El Ministeriu d’Educación, al traviés del Secretariu d’Estáu, señor Marcial Marín, supedita la convocatoria d’ufierta d’empléu públicu docente a l’aprobación  de los Presupuestos Xenerales del Estáu pa 2017, como si la responsabiidá d’ello recayere namás nos partíos políticos de la oposición y non del ministeriu de Facienda y Alministraciones Públiques, ye dicir, del mesmu gobiernu de Mariano Rajoy. Ye más, el ministeriu de Facienda y Alministraciones Públiques yá alvirtió a les CCAA que va recurrir les Ufiertes d’Empléu Público que s’aprueben.

Pero, amás, el señor Marín estocinó nes feríes del profesoráu interino cuando, precisamente cola sida de los Presupuestos Xenerales del Estáu, fala agora d’amenorgamientu de la interinidá y afitamientu d’empléu cola varina máxica d’establecer pa los próximos años una tasa de reposición ensin llendes. Tarrecemos que, si nun s’establecen procedimientos fayadizos y xustos, esta midida ensin más puede suponer la espulsión del sistema educativu públicu de miles de profesores interinos/es.

Ante esta situación, vimos que nos distintos territorios fueron tomando postura y clarificando si va haber oposiciones o non. Dende SUATEA consideramos urxente que n’Asturies se clarifique la situación y s’informe al profesoráu sobre les perspectives ya intenciones de la nuesa Conseyería d’Educación.

Nun ye aceptable esta situación d’incertidume, que puede enllargase inda enforma tiempu, n’espera de qué asocede colos Presupuestos Xenerales y la so posible aprobación. Nun tienen de tenese en cuenta solo los plazos llegales que se precisen pa llevar a cabu los procesos selectivos, sinón tamién la situación na que s’atopen les persones que tán dedicando tol so tiempu a preparar les pruebes y en munchos casos encarando’l gastu que suponen preparadores y/o academies ensin saber, tovía a estes altures, a qué atenese na nuesa Comunidá.

Per otra parte, hai que tener en cuenta que nun ye indiferente la decisión que tomen el restu de Comunidaes Autónomes. Si nun hai oposiciones, y paez que nun les va a haber na mayoría de les Comunidaes, dende SUATEA entendemos que sedría bien inxusto pal nuesu profesoráu encarar el procesu selectivu con un “efectu llamada” qu’enzancaría inmerecidamente l’accesu a una plaza estable al profesoráu que lleva años trabayando nos centros asturianos. Creemos que dempués de dellos cursos con convocatories mínimes o con ausencia de les mesmes, nun puede empobinase a los y les docentes a un procesu neses condiciones. Amás, hai que tener en cuenta que l’alcuerdu d’interinidá que ta vixente n’Asturies, a diferencia de lo qu’asocede na nuesa redolada, nun ufierta nenguna estabilidá y abre les puertes a que puedan apurrise notes llograes en procesos selectivos d’otres CCAA, faciendo entá más atrayente a los aspirantes d’otros territorios el presentase n’Asturies.

Por too ello, dende SUATEA esiximos a la Conseyería d’Educación que convoque de forma inmediata una xunta coles organizaciones sindicales pa tratar esta situación y que se clarifique de forma urxente les intenciones al respective de les oposiciones docentes.  Y, per otra parte, aporfiamos en que ye necesario que les alministraciones educatives alcuerden ensin demoranza: primero, planes d’estabilidá que garanticen, ante cualquier procesu selectivu estraordinariu o non, que naide vaya a perder el so trabayu; y, segundo, l’establecimientu d’un sistema d’accesu estremáu qu’asegure que tol colectivu interín pueda consolidar el so empléu como funcionarios y funcionaries de plenu derechu.

Uviéu, 23 de febreru de 2017

Print Friendly, PDF & Email

Esta entrada está disponible en: Castellano (Castellanu)