A propuesta de SUATEA, cambéu d’aldu nes midíes COVID de principios de cursu

Esta entrada está disponible en: Castellano (Castellanu)

El  Conseyu Escolar del Principáu d’Asturies (CEPA) aprobó güei en sesión plenaria urxente’l dictame sobro la Propuesta de Resolvimientu de 25 de xunu de 2021 de la Conseyería d’Educación pola que s’aprueben les instrucciones d’organización, prevención, contención y coordinación, necesaries pa face-y frente a la crisis sanitaria causada pola COVID-19 nel ámbitu educativu pal cursu escolar 2021-2022, d’aplicación a los centros educativos non universitarios del Principáu d’Asturies. Dichu dictame incorpora toles enmiendes presentaes SUATEA.

SUATEA presentó estes enmiendes por considerar la propuesta poco afayadiza pa enfrentar la situación xenerada y la que va xenerar la pandemia covid-19 nel próximu cursu 21-22:  

-Porque nun tien en cuenta les condiciones reales de peligru comuñal pa la salú nes que se va aplicar yá al entamu del cursu.  Recordar que la quinta fola de la pandemia agora mesmo ta afeutando en muncha mayor proporción a los grupos de menor edá nos que tán incluyíos les nueses/sos escolares. Va aplicase a unos escolares qu’entá nun fueron vacunaos nin previsiblemente lo van ser al empiezu del cursu.

-Porque abandona, en contra de los encamientos del Ministeriu Educación, les ratios y refuerzos de plantiyes del cursu pasáu que valieron pa desaniciar en parte la incidencia negativa de la pandemia na salú y la educación del alumnáu.  

-Porque nun establez midíes eficaces pa compensar faltes y desigualdaes educatives qu’agravó la pandemia: semipresencialidá na ESO y Bachilleratu, y enseñanza non presencial del tercer trimestre del cursu 19-20.  

Toes estes valoraciones y falta de midíes esenciales fueron apreciaes polos conseyeros y conseyeres al aprobar les nueses enmiendes que se sinteticen de siguío:

  • La enseñanza va ser presencial pa toles etapes y niveles educativos con ratios de 20 alumnos per aula y distancia interpersonal mínima de 1,5 m. en toles etapes educatives menos Educación Infantil (EI). En EI la ratio va ser de 15 alumnos/es per aula ensin distancia de seguridá y organizaos en GCE (grupos de convivencia estable).
  • Habrá una dotación presupuestaria específica y suficiente pa caltener les midíes propuestes nesti resolvimientu.
  • Van reforzase les plantiyes col personal necesario p’atender con calidá y equidá la educación del alumnáu y velar pola so salú.
  • Va dotase a los centros de los espacios suplementarios necesarios p’acoyer los nuevos agrupamientos del alumnáu.
  • La Conseyería d’Educación va encargase de la compra y distribución de los materiales necesarios pa facer frente a la pandemia: mázcaros pa les persones que trabayen o estudien nel centru educativu, filtradores d’aire, termómetros, mididores de CO2, equipos informáticos, etc.

Si’l Gobiernu y la Conseyería d’Educación faen casu a les propuestes de la comunidá educativa representada nel CEPA, nel próximu cursu va haber un cambéu d’aldu esencial na meyora de la prevención de riesgos pa la salú, y na equidá y calidá educativa.

El Secretariáu de SUATEA 
N’Uviéu, a 14 de xunetu de 2021

Print Friendly, PDF & Email

Esta entrada está disponible en: Castellano (Castellanu)