Home > Aición sindical > La evaluación docente: Una campaña orquestada contra’l profesoráu

La evaluación docente: Una campaña orquestada contra’l profesoráu

Una campaña orquestada contra’l profesoráu

Asistimos dende va unes selmanes a una campaña nos medios de comunicación que’l so fin principal paez ser responsabilizar al profesoráu polos defectos del sistema educativu de la totalidá del estáu.

La publicación inminente del Llibru Blancu encargáu pol ministru Méndez de Vigo a José Antonio Marina, va nesa llinia. Les propuestes p’ameyorar la educación tienen que ver con vieyes recetes neolliberales con efectos nefastos nos países onde s’apliquen. La panacea pa resolver esos problemes ye la evaluación del profesoráu.

Si hubo miles de despidos na enseñanza pública en tol Estáu, si la precariedá de les   plantiyes docentes ye moneda corriente nos centros educativos, si aumentó’l númberu d’alumnáu per aula, si les families traviesen situaciones económiques y sociales pergraves, si sumieron recursos destinaos a l’atención a la diversidá, beques, comedores escolares, si’l porcentaxe destináu a educación menguó hasta un 4% del PIB, paez claro qu’estes variables nun-yos importen y por el contrario carguen tola responsabilidá sobre’l profesoráu.

De nada valen los esfuerzos titánicos de los docentes pa– magar de los retayos brutales sufríos- caltener l’atención al alumnáu. De nada valen, énte la campaña orquestada contra’l profesoráu a la qu’asistimos clisaos.

L’informe presentáu pola OCDE, que nos últimos años se convirtió nel máximu referente en materia educativo, cuando se trata d’una organización de calter económicu, ye un informe de más de 500 páxines sobre l’estáu de la educación nos sos países miembros, convirtióse na última andanada contra’l profesoráu nel nuesu país.

NUn paez casualidá que de los miles de datos que tien l’informe mui bien d’ellos reconociendo los retayos y los sos efectos negativos nel nuesu sistema educativu- resaltárense dos: el númberu de mozos que nin estudien nin trabayen y la falta d’evaluación del profesoráu.

Inclusive se reproducen frases incomprensibles del informe pa falsiar la realidá  “n’España la única consecuencia d’unos malos resultaos nuna evaluación ye nun consiguir la certificación pal puestu como docente” según frase reproducida pelos medios del informe. La realidá ye que la inmensa mayoría de los docentes de la enseñanza pública superó pruebes perdures d’ingresu a la docencia, tres años de formación. Y que’l serviciu d’inspección somete regularmente a los centros educativos a planes d’evaluación entamaos poles Conseyeríes d’Educación. No que s’atestona ye no que machaconamente vien aneciando estos últimos tiempos. Nun s’analiza la sobrecarga de trabayu del profesoráu, l’apolmonante burocracia que nos afuega, la imposición d’una Llei contra la inmensa mayoría de la Comunidá Educativa.

Los problemes que güei aquexen a la enseñanza pública nun se resuelven culpando al profesoráu que ye víctima de los retayos, sinón revirtiéndolos, derogando la LOMCE, recuperando les condiciones llaborales anteriores a los retayos, menguando l’horariu llectivu, estabilizando al profesoráu interíno, acabando cola precariedá, estableciendo una verdadera atención a la diversidá, invirtiendo na meyora de les instalaciones, servicios complementarios y garantizando la gratuidá real de la educación pública.

Lo qu’en realidá pretende’l Partíu Popular, y llamentablemente otres opciones polítiques, ye degradar la figura de los docentes, esplicar que la falta d’evaluación ye la responsable de tolos males y poner en marcha un sistema retributivu qu’amenorgue nuevamente los salarios docentes col cebu de premiar a los bonos docentes. La razón de too ello son los compromisos adquiríos ante Bruxeles pa menguar entá más el porcentaxe del PIB destináu a Educación hasta un 3’7% nos próximos años. Y ello cuando’l mesmu Conseyu Escolar del Estáu esixía algamar un 7%. Nun hai una esmolición real nel nuesu país pola educación y pa que l’oficiu docente sía respetáu. A lo qu’asistimos ye a una campaña d’acosu y valtamientu contra quien tenemos nes nueses manes a la mocedá d’esti país. Recuperar siquier la situación anterior a los retayos, derogar la LOMCE, contratar nuevos docentes abondo y un compromisu pa que na próxima llexislatura s’algáme esi 7% son les esixencies mínimes p’ameyorar mínimamente la educación nel nuesu país.

Estes, precisamente, son les esixencies de SUATEA y la Confederación de STEs-Intersindical que tamos desenvolviendo nuna campaña estatal p’acabar colos retayos y esixir la derogación de la LOMCE.

Secretariáu de SUATEA y STEs-intersindical
25 payares de 2015

 

Esta entrada tamién se puede consultar en: Castellanu