Borrador Ufierta d’Emplegu Públicu

Na mañana de güei, 14 de setiembre, tuvo llugar la segunda xunta del grupu de trabayu sobro Ufierta d’Emplegu Públicu docente de 2017 en Asturies. L’Alministración educativa asturiana apurriónos un DOCUMENTU BORRADOR nel que, d’acordies colo previsto nel Alcuerdu pa la Meyora del Empléu Públicu de 29 de marzu de 2017 robláu ente’l Ministeriu de Facienda y les organizaciones sindicales CCOO, UXT y CSIF, figura la tasa adicional pa la estabilización d’emplegu temporal, que consiste nun global de 759 places.
Amás, sumaríense 347 places correspondientes a la tasa de reposición de 2017 y les futures tases de reposición de 2018 y 2019.
Dende SUATEA fixéronse les siguientes propuestes y valoraciones:

• Executar esta OEP en cinco años, o siquier dos oportunidaes pa tolos Cuerpos docentes. El MECD propunxo que s’executen en cinco años, alternando Cuerpu de Maestros y el restu de Cuerpos docentes mientres los cuatro primeros años y una última convocatoria “escoba” pa tolos Cuerpos. Si esto se fai  asina na mayoría de les CCAA, en Asturies tien de ser igual.
• Convocar namái les especialidaes nes que pueden ufiertase un mínimu de cinco places.
• Coordinar col restu de CCAA les convocatories pa evitar l’efectu llamada. Ye importante coordinar los tiempos d’execución, los cuerpos y especialidaes a convocar y la fecha de celebración de los procesos selectivos.
• Qu’énte esta circunstancia escepcional, derivada del Alcuerdu pa la Meyora del Emplegu Públicu de 29 de marzu de 2017, esta Conseyería defenda allá onde sía pertinente un cambéu del modelu d’accesu a la función pública docente. Pola nuesa parte, dirixímosnos al MECD esixendo la convocatoria urxente de la mesa sectorial p’axustar el cambéu de sistema d’accesu col que se desendolqueríen estos procesos selectivos.

La tasa de profesoráu interín supera n’Asturies el 30% de la plantiya docente, sobremanera porque’l funcionamientu de l’Alministración ye inadecuáu al nun realizar ufiertes d’empléu públicu  amañoses pa coles necesidaes del sistema educativu. Por tanto, dende SUATEA vamos defender qu’estes convocatories sirvan pa consolidar nel emplegu al profesoráu interín qu’ocupa les places. Si nun se tomen les midíes oportunes, esti procesu de estabilización qu’agora s’empecipia va suponer un ERE masivu pal profesoráu interín.

Uviéu, 14 de setiembre de 2017