Home > Comunicaos > ¿Un pactu contra la Educación Pública?

¿Un pactu contra la Educación Pública?

PP, C’s y PSOE proponen la creación d’una subcomisión nel Congresu de los Diputaos p’algamar un Pactu Educativu

Los grupos políticos Popular, Ciudadanos y Socialista rexistraron nel Congresu de los Diputaos una propuesta de creación d’una subcomisión, nel senu de la Comisión d’Educación, “pa la ellaboración d’un gran Pactu d’Estáu Social y Políticu pola Educación” que valga “de base pa que’l Gobiernu ellabore un proyectu de Llei Básica d’Educación, que sustituya la lexislación vixente y que naza cola vocación d’estabilidá a partir d’un ampliu alcuerdu parlamentariu y social”.

La pomposidá de la iniciativa va contra  lo que SUATEA y  los STEs venimos demandando dende la imposición de la LOMCE: la so derogación total ya inmediata y la reversión de los retayos educativos tienen que ser el puntu d’entamu d’un procesu de diálogu cola comunidá educativa pa llograr un alcuerdu social y políticu que dignifique a la Educación Pública.

Ante esti anunciu, nun podemos dexar de tener en cuenta los pactos d’investidura alcordaos primero por PSOE Ciudadanos y depués por Ciudadanos PP. Recordamos que, en nengún de los dos, non solo nun s’esplicitaba la derogación de la LOMCE, sinón qu’en dambos s’apostaba pol caltenimientu d’un modelu d’educación neolliberal, suxetu a los intereses privaos y escaeciendo que la enseñanza pública tien que ser la exa vertebradora del sistema educativu.

L’actual Ministeriu d’Educación, sicasí, sigui calteniendo la execución de les reválides de 4u d’ESO y 2 u de Bachilleratu, y el so titular Méndez de Vigo matizó, al respective de la propuesta de pactu educativu, que “esto nun ye esactamente derogar la LOMCE” y que ésta va siguir aplicándose con normalidá. Hai demasiaos motivos de desconfianza ante intenciones que poco o nada convencen.

SUATEA y la Confederación de STEs-intersindical nun vamos aceptar que dende les instancies polítiques sigan burllándose les esixencies de la comunidá educativa. El cambéu que reclama la Escuela Pública esixe acciones clares y decidíes, empicipiando pol diálogu coles organizaciones que la representamos. Mientres nun sía asina, vamos  siguir impulsando les movilizaciones necesaries nos centros educativos y na cai.

 

Secretariáu de SUATEA /STEs-intersindical                                                                                                                   28 de noviembre de 2016

Esta entrada tamién se puede consultar en: Castellanu