Home > Comunicaos > 5 d’ochobre: Día Mundial de les y los docentes

5 d’ochobre: Día Mundial de les y los docentes

“Valoremos a les  y los docentes, ameyoremos la so situación profesional”

 Nesti 2016  conmemórase’l 50º aniversariu de l’aprobación, en 1966, del Encamientu conxuntu de la OIT y l’UNESCO relativu a la situación del personal docente y que dio orixe al  Día Mundial de les y los Docentes.

El lema d’anguaño, “Valoremos al docente, ameyoremos la so situación profesional”, recueye los encamientos de OIT y l’UNESCO, según los conteníos de l’Axenda d’Educación 2030 y los Oxetivos de Desenvolvimientu Sostenible 2016 de la ONU. Estos documentos reclamen  una educación de calidá ,inclusiva y equitativa, sofitándose nunos  docentes contrataos y remunerados de forma afayadiza y unos sistemes dotaos de recursos. Incídese tamién na necesidá de qu’esi profesoráu tenga una afayadiza formación y cualificación y que se vea armáu por abonda motivación.

Estes afirmaciones choquen cola realidá de les directrices establecíes nes axendes neolliberales, aplicaes per bona parte de los gobiernos, onde’l so oxetivu ye mercantilizar los derechos básicos y colonizar los servicios públicos por empreses privaes. Si faemos casu a l’Axenda d’Educación 2030, l’algame d’una Educación Primaria universal pa esa fecha precisaría aumentar en más de 3 millones el númberu de maestros y maestres (5 millones si aspiramos a estender la escolarización al tramu de la Secundaria básica universal). Pero, cola Educación convertida en negociu en manes privaes, ye difícil imaxinar qu’un ampliu segmentu de les clases trabayadores de gran parte del mundu pueda aportar a daqué distinto qu’una cenciella beneficencia, nel meyor de los casos.

Guapos oxetivos, pero bien alloñaos, cuando en México, el meru exerciciu de la protesta puede costar la vida d’un gran númberu de docentes, o cuando en Turquía ta entamándose, con total impunidá ante la UE y la comunidá internacional, una depuración sistemática d’enseñantes.

Si la situación ye dramática na periferia económica, nel senu de la Unión Europea tampoco llibramos del azote de les polítiques de retayos y les llimitaciones a la llibertá. Los gobiernos europeos, sían o non conservadores, apuesten decididamente por amenorgar l’Estáu, cuando la xestión pública ye la única que puede garantizar una prestación del serviciu en condiciones de gratuidá y universalidá.

Nel Estáu Español, con una LOMCE diseñada p’adoctrinar, privatizar y desregular el trabayu docente, les Alministraciones educatives son les primeres en xeneralizar el recursu a una mano d’obra precaria -el profesoráu interino-, lo que contravién l’Encamientu 45 de la OIT y l’UNESCO de 1966 sobre la seguridá nel empléu: “La estabilidá profesional y la seguridá del empléu son indispensables tanto pal interés de la enseñanza como pal personal docente y tendríen de tar garantizaes inclusive cuando se produzan cambeos na organización tanto del conxuntu como d’una parte del sistema escolar”.

Secretariáu de SUATEA Confederación

de STEs-intersindical

5 d’ochobre de 2016

 

Esta entrada tamién se puede consultar en: Castellanu