5 d’chobre: Día de la Docente

Esta entrada está disponible en: Castellano (Castellanu)

Igualdá llegal nun ye igualdá real

Enseñar ye una xera mayoritariamente exercida por muyeres. Con 97% de presencia femenina n’educación infantil y 80 % en primaria, esta tasa baxa sucesivamente hasta llegar  a la Formación Profesional, el tipu d’enseñanza con menos presencia femenina. Pero, de toles maneres, dende la educación infantil a la universidá, les muyeres superen en númberu a los homes en tolos estamentos de la enseñanza.

Magar d’ello, los paisanos siguen teniendo una sobre-representación nos equipos directivos. Solo nos colexos, onde la presencia femenina perpasa sobrao a la masculina, los equipos directivos tán conformaos mayoritariamente por muyeres, pero nos institutos los directores ocupen el 60 % de les direcciones, inda cuando los homes representen namá’l 40% de la plantiya. Na universidá, el zarru social a los escalafones más altos ye inda más evidente, siendo munches menos les cátedres ocupaes por muyeres, namá un 21%.

Entá nes etapes educatives con un porcentaxe ablucatemente femenín, nosotres nun ocupamos más que daqué más de la metá de les direcciones, inclusive nesti casu, ellos siguen sobre-representaos. El diagnósticu ta fechu, pero la cura pa llograr una proporcionalidá ente’l pesu na plantiya y la so representación nos equipos directivos, falta enforma p’atopala d’equí a poco.

La fuerza de trabayu nel sector públicu ye principalmente femenina en cualquier tipu d’alministración, y llargamente mayoritaria na educación. Quiciabes sía esi’l motivu de que l’oficiu docente tea devaluándose énte la sociedá y de que cada vez se vean más amenorgaos los nuesos derechos, se precaricen  los contratos d’interinidá, aumenten les ratios y les hores llectives, nun se sustituyan les baxes nin s’axilicen los permisos por riesgu mientres l’embaranzu. ¿Ye qu’un trabayu realizáu mayoritariamente por muyeres nun puede ser xustamente valoráu?  

Conocedores de que la ideoloxía patriarcal imperante na empresa privada apóstranos d’avezu a ocupar puestos per debaxo de la nuesa cualificación, munches de nós vimos na alministración una oportunidá de trabayu. Pero… ¿l’empléu públicu ye realmente garantía d’igualdá d’oportunidaes d’accesu, igualdá salarial ya igualdá de promoción profesional? Les estadístiques –inclusive les del propiu Ministeriu d’Educación y Formación Profesional- amuesen qu’esa nun ye la realidá. Si nun tamos énte un problema de discriminación llegal, entós ¿cómo esplicar les diferencies? L’analís apurríu pola socioloxía puede ayudar a entender que les relaciones sociales patriarcales heredaes, y asitiaes firmemente sobro’l sistema económicu vixente, favorecen la esistencia del llamáu “techu de cristal”, o les diferencies reales de rentes ente muyeres y homes.

Tenemos de preguntar: ¿quién solicita mayoritariamente amenorgamientos de xornada per cuidu de les fíes/vos o mayores?, ¿quién nun quier añedir al so trabayu de docencia directa col alumnáu les xeres directives, porque en casa espéra-y un tercer trabayu ensin remuneración y escasa reconocencia social?, ¿a quién se-yos tresmitieron principalmente roles acomuñaos al llideralgu dende bien neñu?… la respuesta que deamos a estes entrugues seguro qu’ayuda a esplicar les diferencies de renta, de númberu d’años cotizaos a la seguridá social, o les torgues pa romper el “techu de cristal”.

Inclusive con delles polítiques entamaes dende los poderes públicos pa desaniciar la discriminación de la muyer, y evitar que xuegue con desventaxa nel mercáu llaboral –cómo la igualación del permisu de paternidá al de maternidá- atopamos con diferencies salariales o l’arrenunciu a la carrera profesional. ¿Ónde anicia entós el problema?.

Les muyeres podemos xugar un papel activu y consciente na construcción del nuesu futuru y el que compartimos cola sociedá nel so conxuntu. Sicasí, esiste una inercia social enraigonada nel patriarcáu, que sobro la base del sistema de relaciones económiques y sociales anguaño vixentes, construyó un sistema cultural paralelu qu’evoluciona adulces.

El movimientu feminista llucha contra esa inercia social qu’opera en tolos ámbitos de la nuesa sociedá, dende la familia al sistema educativu. Ensin querer, inclusive les muyeres, somos cómplices del caltenimientu d’esos valores na nuesa sociedá. Esos mecanismos del patriarcáu actúen de normal sol estragal de la nuesa consciencia, ensin buscalo pela nuesa parte, como formes sutiles de violencia simbólica. El patriarcáu, al que la sociedá d’anguaño nun toleraría que s’esibiera d’una manera franca, atopó cómo sobrevivir con mecanismos acomuñaos al micromachismu y a una inercia social tolerante con un sistema de producción y distribución acordies.

Camudar les lleis ye más fácil que camudar la sociedá. Nesi sentíu, dende la Organización de Muyeres, nun vamos enflaquiar el nuesu enfotu por caminar escontra  una sociedá realmente igualitaria, y el trabayu nes aules ye una ferramienta fundamental  pa llogralo.

N’Uviéu a 5 d’ochobre de 2021

Print Friendly, PDF & Email

Esta entrada está disponible en: Castellano (Castellanu)


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4757

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4757