4 de abril, Día Internacional contra la Esplotación Sexual Infantil

Esta entrada está disponible en: Castellano (Castellanu)

Nun esiste una definición común del conceutu Esplotación Sexual Comercial de Neños, Neñes y Adolescentes. Polo xeneral, la definición más consensuada ye la que figura na Declaración y Programa pa l’acción del primer congresu mundial contra la esplotación sexual comercial de neños, neñes y adolescentes: “La esplotación sexual comercial infantil ye una violación fundamental de los derechos del neñu y de la neña. Entiende l’abusu sexual por parte d’adultos y la remuneración n’efectivu o n’especie pa la criatura o una tercer persona o persones. La neña o’l neñu son trataos como oxetos sexuales y como oxetos comerciales. La esplotación sexual comercial de menores constitúi una forma de coerción y violencia, y equival a trabayu forzosu y una forma contemporánea d’esclavitú”.

Trés son les maneres fundamentales nos que se manifiesta esta violencia sexual contra la infancia:

  1. Abusu sexual infantil con o ensin contactu.
  2. Imaxes d’abusu sexual al traviés de les TIC.
  3. Esplotación infantil y trata.

La mayoría d’estudios sobre l’abusu sexual infantil coinciden en que la mayoría de les víctimes son neñes, Naciones Xuníes concreta qu’aproximao un 80%.

Les nueves tecnoloxíes, qu’en tantos campos fueron una gran meyora nes nueses vides, ayudaron a la medría de la trata infantil sexual. Miles de pedófilos enllenen les redes impunemente aprovechando cualquier circunstancia d’engañu pa llograr imaxes de neños/es ensin ropa y n’actitúes inusuales a la so edá. A esto podemos suma-y el llamáu “turismu sexual infantil” que munchos homes (principalmente) practiquen en países nos qu’acceder a esti tipu de turismu ye senciellu y baratu. Munchos d’ellos son pedófilos y, munchos otros non, a cencielles aprovéchense d’ello cuando ven la disponibilidá de neñes y neños, qu’escarecen de recursos básicos como ropa y comida, polo qu’en cualquier momentu venden el so cuerpu por necesidaes elementales de sobrevivencia. Esti tipu de turismu dase sobremanera en países probes onde les Autoridaes del Estáu lo atapen por beneficiu propiu, son ingresos económicos algamaos impunemente por Gobiernos corruptos ya indignos.

Asina comprobamos que cuando organismos internacionales tomen midíes en países como Tailandia, unu de los destinos prototípicos de turismu sexual infantil, los países cercanos, como Camboya o Vietnam, aprovechen pa tomar el relevu. Una encuesta realizada en 2002 pola Organización Aldétous amosó que de 4.214 visites con propósitos sexuales de les qu’hubo rexistru en Camboya, un 36% yeren del propiu país, un 42% asiáticos orientales (chinos, vietnamites y xaponeses) y 22% occidentales. Anque la encuesta nun ye de recién, déxanos ver cómo’l turismu sexual infantil ta hasta nel mesmu país onde nin siquiera tienen conciencia de l’aberración que cometen con neñes y neños de la so propia sangre.

Una de les llínees de trabayu que se fixo pa erradicar esta práctica ye’l Códigu de Conducta que más de 1000 empreses turístiques soscribieron. Dellos españoles como hoteles NH, Meliá, Iberia y Grupu Barceló. El documentu compromételos a lluchar de manera activa contra la prostitución infantil: informando de cualquier niciu de turismu sexual, observando entraes y salíes de clientes con neñes neños, informando enantes de viaxar de lo que pueden atopar nestos países y el problema que puen tener si faen usu d’esplotación sexual infantil…a última hora, concienciar a les persones de si lleven ciertes intenciones nel so viaxe, meyor quedase en casa.

Hai que siguir denunciando, escorriendo, concienciando per parte de la sociedá, gobiernos, autoridaes y ONGs, de qu’esta esplotación tien de desapaecer, y que pa lluchar contra esti problema hai qu’arrincar de raigañu otru bien grave, la probitú.

Nun son culpables de nacer onde nacieron, de pertenecer a families que los desahucien enantes de ser muyeres y homes, de sobrevivir como puen…anque la solución sía usar el so cuerpu pa enllenar l’estómagu y p’arropase y nun sentir fríu cuando la soledá d’esi mundu contrariu ye la so única compañía.

 

Organización de Muyeres de la CI

Secretaría de la Muyer de SUATEA

Print Friendly, PDF & Email

Esta entrada está disponible en: Castellano (Castellanu)