28S Día d’ACCIÓN GLOBAL pola despenalización y llegalización del albuertu

Esta entrada está disponible en: Castellano (Castellanu)

Asumióse’l 28 de setiembre como’l día pola despenalización del albuertu, nel marcu del V Alcuentru Feminista de Llatinoamérica y el Caribe, celebráu en San Bernardo, Arxentina, nel añu de 1990. Esta propuesta presentóse pola delegación brasileña pa conmemorar el 28 de setiembre de 1888, cuando en Brasil declaró la llibertá de banduyos, asegurando la llibertá a toles fíes y los fíos nacíos de muyeres esclaves.

La llexislación en materia de despenalización y llegalización del derechu al albuertu varia drásticamente en tol mundu.
Dalgunos –bien pocos- países reconocen esti derechu a solicitú de les muyeres y ensin llende nel periodu xestacional. Nel estremu opuestu, Nicaragua, Honduras, Madagascar, Ciudá del Vaticanu, República Dominicana, Malta, Andorra y El Salvador ta prohibíu so cualquier circunstancia. Ente medies, les restricciones van dende la llende xestacional, la protección de la vida de la muyer, malformaciones fetales, casos de violación, etc.

Sía que non, sabemos que les meyores consiguíes en materia de salú sexual y reproductiva son la resultancia de les lluches feministes y la so capacidá de tresformación de les sociedaes. De la mesma, somos conscientes –o tendríamos de selo- de la so fraxilidá: los derechos son difíciles de conquistar y tanto, o más, de caltener, especialmente, cuando cinquen a la llibertá de les muyeres. Unu de los exemplos más recién ye Estaos Xuníos, onde l’albuertu dexó de ser un derechu constitucional solo cincuenta años dempués de la so despenalización. N’España, los intentos de la derecha remanecieron con roxura acometiendo contra quien denunciaron les sos coacciones y performances caleyeres. Ataques apocayá tipificaos, a la fin, como acosu a les muyeres qu’alleguen a clíniques pa la interrupción voluntaria del embaranzu pola Llei Orgánica 4/2022, de 12 d’abril  que modifica la Llei Orgánica 10/1995, del Códigu Penal.

La postrera propuesta de cambéu de la Llei Orgánica 2/2010 de salú sexual y reproductiva y d’interrupción voluntaria del embaranzu volvió causar reacciones gafientes ente los sos detractores. Al paecer, conceder la capacidá de decisión a les menores de 16 y 17 años, como faía la Llei de 2010, vuelve llevantar angüeñes, anque, paez que lo que más esmolez agora ye la educación afeutivu sexual na enseñanza obligatoria.

Dende la Organización de Muyeres de la Confederación Intersindical esiximos que s’aceleren los plazos pa la entradaen valor d’esti cambéu de la Llei y vamos velar pol so cumplimientu íntegru en tolos territorios del estáu español, denunciando cualquier irregularidá. Coles mesmes, siguimos lluchando por regulaciones llexislatives que recueyan la interrupción del embaranzu ensin restricciones en tolos países

Enllaz al vídeo: https://www.youtube.com/watch?v=KjBAWqCAvtg

¡POL NUESU DERECHU A DECIDIR!

¡POLOS DERECHOS DE LES MUYERES!

Organización de Muyeres de la CI
Secretaría de la Muyer de SUATEA

Print Friendly, PDF & Email

Esta entrada está disponible en: Castellano (Castellanu)