28 de mayu – Salú de les muyeres

Esta entrada está disponible en: Castellano (Castellanu)

Nun podemos escaecer en nuestru calendariu’l Día Internacional d’Acción pa la Salú de les Muyeres. Un día que se conmemora col oxetivu de reafirmar y garantir el derechu a la salú integral de toles muyeres y neñes alredor del mundu. Ye un recordatoriu fundamental p’abordar y prevenir les milenta causes d’enfermedá y muerte qu’afecten a les muyeres del mundu.

Nestos tiempos, ser muyer considérase un factor de riesgu cuando falamos de salú mental. Hai estudios abondo que demuestren que, polo xeneral, les muyeres tienen tases de depresión, estrés, ansiedá o trestornos de l’alimentación mayores que los homes.

P’algamar la metá de la igualdá en campu de la salú ye importante investigar les diferencies qu’hai ente dambos dos sexos, lo mesmo a la hora de manifestase los síntomes, como’l so tratamientu médicu y llaboral. Necesitamos identificar cuálos son los factores que ponen en riesgu’l cuidáu de la salú de les muyeres pa ser eficaces cola información y los servicios de salú.

Hai diferencies ente homes y muyeres rellacionaes, especialmente, cola mayor esposición a la probitú. Les muyeres tienen trabayos mal pagos, la mayoría a xornada parcial, a lo qu’hai que meté-y la sobrecarga de trabayu en casa y tener que curiar familiares que, en cuenta repartise equitativamente, dan más trabayu a les muyeres ensin que se-yos reoconoza nada. Amás, la violencia machista en trabayu (acosu y discriminación, ente otres coses) aumenta la posibilidá de carecer problemes de salú mental. Nesi sen, estímase que los casos de depresión son, aproximadamente, el doble ente muyeres qu’ente homes.

Según un informe de la OCDE, n’España les muyeres dedicamos más del doble d’hores que los homes al trabayu en casa. Esti fenómenu de doble rol produz fatiga, estrés o depresión. Fenómenu al qu’hai que sumar la presión pola maternidá, menor capacidá a la hora d’escoyer o la consideranza de la muyer como oxetu sexual.

Nun pueden cayer en sucu baxeru estos factores o “mandatos” que nos asigna la sociedá y qu’empeoren l’estáu de la salú de les muyeres, porque fae medrar el riesgu de carecer depresión o ansiedá.

De manera que, d’una parte, necesítase siguir col llabor d’investigación y formación de profesionales en tolos ámbitos (científicu, santiariu, educativu, xudicial, llaboral) pa detectar y desaniciar los estereotipos, o roles asignaos al sexu, que condicionen y provoquen perxuicios na salú de les muyeres.

Recientemente, la nueva Estratexa Española de Seguranza y Salú nel Trabayu 2023-2027, incorpora una llinia d’acción específica en salú mental qu’aborda l’enfoque de xéneru. Celebramos tolos avances, anque llegue con retrasu y carencies. De magar se creó l’Observatoriu de la Salú de les Muyeres en 2024 –yá con un tardanza evidente-, nun ye hasta la pandemia del Covid qu’entama a espardese, más allá de los círculos especializaos y activistes, estudios de les repercusiones del confinamientu na salú de les muyeres, o les reivindicaciones de la poca o nula investigación de la sintomatoloxía y tratamientu según la varante sexu. Poro, dende la Organización de muyeres de la Confederacion Intersindical vamos siguir lluchando pola investigación nel área de la salú de les muyeres y la consecuente puesta en marcha de midíes sociales y llaborales. Necesitamos un compromisu firme y decidíu de les alministraciones pa promover polítiques, cultures y practiques d’obligáu cumplimientu que sirvan pal bientar físicu y emocional de les muyeres.
El feminismu tamién ye bonu pa la salú.

Print Friendly, PDF & Email

Esta entrada está disponible en: Castellano (Castellanu)