28 d’abril 2015, Día Mundial de la Seguranza y la Salú Llaboral

Esta entrada está disponible en: Castellano (Castellanu)

15-04-28 Cartel Salud Laboral28 d’abril 2015, Día Mundial de la Seguranza y la Salú Llaboral.

”Xúnete a la construcción d’una cultura de la prevención en materia de Seguranza, Salú y Trabayu”.

Dende SUATEA y la Confederación-Intersindical queremos xuntanos a esta conseña propuesta pola OIT pa 2015, onde una cultura estatal de prevención en materia de seguranza y salú nel trabayu implica’l respetu del derechu a gociar d’un mediu ambiente de trabayu seguru y saludable a tolos niveles; la participación activa de los gobiernos, los/es empleadores y los/es trabayadores p’asegurar un mediu ambiente de trabayu seguru y saludable al traviés d’un sistema de derechos, responsabilidaes y deberes definíos y l’atribución de la máxima prioridá al entamu de la prevención.

Esti añu la OIT celebra’l Día Mundial de la Seguranza y la Salú nel Trabayu col envís de promover la prevención d’accidentes de trabayu y enfermedaes profesionales en tol mundu. Trátase d’una campaña de sensibilización que tien l’oxetivu en centrar l’atención a nivel internacional sobre los nuevos tendencies nel ámbitu de la seguranza y la salú nel trabayu y sobre la magnitú de les mancadures, enfermedaes y muertes rellacionaes col trabayu.

N’España les socesives reformes llaborales dexáronnos una medría curiosa de los accidentes de trabayu, que pasaron de 1.156.574 a 1.170.602 de los que los accidentes con baxa efectiva fueron más del 70% de los totales. Les muertes por accidentes de trabayu nel 2014 fueron de 111. Amás, les enfermedaes profesionales xubieron nes estadístiques declaraes -que nes ensin declarar ye tovía mayor- dende los 16.901 en 2013 a los 17.260 en 2014.

Dende SUATEA y dende la Confederación-Intersindical vemos que la mano d’obra, el trabayu, ye consideráu como una mercancía cola que s’axusta escaeciendo los principios fundamentales que rixen les rellaciones ente los Estaos y les empreses declaraes na fundación de la OIT. Ye especialmente grave’l casu de les multinacionales, que son responsables del 60% del comerciu mundial, y que son les principales xeneradores de desigualdaes al nun aplicar les lleis n’España y otros países, yá sía, en contratos económicos, como en condiciones de trabayu, cuestiones mediu-ambientales, etcétera.

Dende SUATEA y la Confederación-Intersindical esiximos:

– Una formación afayadiza a los/es trabayadores que-yos dexe conocer los riesgos surdíos nel so puestu de trabayu y con una continuidá nel tiempu que-yos dexe prevenir efectos adversos na so salú.
– Reconocencies médiques añales que mos dexen conocer el nuestru estáu de salú y les causes de los problemes que xeneren les nuestres enfermedaes profesionales.
– Protección a los/es trabayadores especialmente sensibles que riquen pola so problemática individual una adaptación del so puestu de trabayu daes les sos característiques personales.
– Una reconocencia de les funciones, tiempu y medios pal desempeñu del papel tan importante que desempeñen los/es delegaos/es de prevención, que son l’eslabón más escaecíu – cuando non reprimíu- na nuestra cadena del procesu productivu.
– Una regulación de les nueves situaciones que se producen pola precariedá nos trabayos que faen que se multipliquen les baxes llaborales y los accidentes de trabayu . Esta regulación tien de dir d’acordies colos criterios almitíos de garante de la salú llaboral, física, psíquica y social de los/es nuestros/es trabayadores nel so conxuntu.

Por ello, dende SUATEA Y LA CONFEDERACIÓN-INTERSINDICAL plantegamos que se defenda dende’l gobiernu a les instituciones clave que determina la nuesa llei de Prevención y Salú Llaboral, que precisamente anguaño cumple 20 años dende la so promulgación, y fagan coles mesmes unes polítiques de distribución de la riqueza per aciu d’unos xornales mínimos xustos y dignos basaos na negociación colectiva que ye la garantía, tamién, de la nuestra llibertá sindical, y que podamos reducir la desigualdá social y económica esistente nel nuestru país que fai qu’un 20% de la población tea en condiciones de marxinalidá y probitú.

TRABAYADOR/A:  “LA SALÚ LLABORAL PADEZSE, PERO NUN PEREZ”.

POR DIGNIDÁ, LLUCHA POR DEFENDER LOS TOS DERECHOS LLABORALES

 

Print Friendly, PDF & Email

Esta entrada está disponible en: Castellano (Castellanu)