26 d’abril – Día de la visibilidá lésbica

Añu 2021, y sigue faciendo falta un exerciciu públicu de visibilidá de les muyeres lesbianes énte la sociedá, como muyeres llibres, ciudadanes de plenu derechu, qu’han de siguir reclamando l’espaciu que-yos pertenez na sociedá. Porque la invisibilidá ye una forma de maltratu.
Hai 17 años que’l marcu llegal ampara la igualdá, pero la sociedá avanza a otru ritmu y los estigmes siguen mancando. Por nosotres, poles nuestres families, por aquelles muyeres que miren pa España como un referente d’igualdá y esperanza. Poles que llucharon primero y, especialmente, poles que vienen detrás, toes eses moces que tovía güei sufren actitúes de lesbofobia na so redolada.
El coste que l’andancia tuvo nes rellaciones, el llindamientu de los contactos sociales fuera l’entornu familiar, dexó a delles moces y muyeres soles nun entornu hostil. Por ello, el profesoráu tien de ser especialmente sensible, igual qu’otros profesionales socio-sanitarios pa detectar, acompañar y dar apoyu, tamién, a les alumnes lesbianes. Nesi sentíu, namás dende la coeducación podrá llevantase una sociedá respetuosa cola diversidá, na qu’esta seya vista como un valir de medría y meyora democrática.
Por too ello, dende la Organización de Muyeres desiximos a les instituciones la formación de profesionales de la Educación nel trabayu pol respetu a la diversidá afectivo-sexual y la igualdá de xéneru y el tratamientu curricular que se pon nes normatives vixentes. Que nun se mutilen conteníos, negando la rialidá de les persones LGTB y les sos families. Queremos una sociedá laica qu’escluya la relixón del currículu educativu, asina como la valoración crítica de les desigualdaes que permita superar los comportamientos sexistes. Y perriba de too queremos esaniciar cualesquier tipu de lesbofobia na escuela.
Como muyeres nun podemos escaecer que na nuestra sociedá les diferencies ente homes y muyeres siguen. La llaceria de la violencia machista, la fienda salarial, la precariedá llaboral son conceptos que mos acompañen. Esta ye una rialidá que vamos cambiar cola solidaridá de toes y toos aquellos que creen na igualdá y la democracia.
Nesti día, pidimos a les instituciones un compromisu públicu y firme d’apoyu a la visibilidá lésbica, pa que se pongan les midíes necesaries que permitan a les lesbianes igualdá plena na contorna llaboral, educativa y social, d’una forma rial y efectiva. Desiximos firmeza na aplicación de les lleis pa que nun exista posibilidá dala de sufrir discriminación por motivu d’orientación sexual; que los servicios de salú garren conciencia de les rellaciones sexuales ente muyeres y tengan en cuenta esta rialidá pa garantizar una atención completa y amañosa. Reclamamos que se fagan estudios, estadístiques y muestreos de la mesma forma que se fau con otros colectivos. Asina como campañes pa la prevención de les infeiciones de tresmisión sexual y pa la prevención del cáncer de mama y úteru empobinaes a esti colectivu.
Pa rematar, dende la Organización de Muyeres queremos agradecer y señalar la llucha de les muyeres lesbianes, a lo llargo de la historia, polos derechos de toles muyeres, cola so presencia en toles movilizaciones y reivindicaciones, asina como col so trabayu incansable poles llibertaes.
Organización de Muyeres CI
26 d’abril de 2021