24 de mayu, Día internacional pola paz y el desarme

Esta entrada está disponible en: Castellano (Castellanu)

True peace is not the merely the absence of war, it is the presence of justice”.
Jane Addams

Quiciabes esta curtia cita, pronunciada por Jane Addams va un sieglu, puea resumir la vieya llucha de la muyer pola paz. Hasta que nun entendamos y pongamos a furrular el encamientu que lleva implícitu vamos siguir en conflictu, colos demás y con nós mesmos/es.    

Vivimos nun mundu de prieses, onde lo importante difumínase y retárdase sine die ante lo urxente. Ye menester la sensibilización y la reflexón sobre d’ónde venimos y pa ónde vamos. La pandemia, una oportunidá d’aprendizaxe énte los retos vinientes, enseñónos que lo que de verdá tenemos en más estima ye lo más algamadizo y va siguir siéndolo mientres apostemos por un usu sostenible de los recursos naturales y curiemos el nuesu medioambiente. Poco nos duró la llección, toos y toes, en parte, somos culpables del sistema mundial actual. Fálase de siguío de les crisis financieres, abren telediarios ya ilustren portaes de periódicos, cuando la nuesa mayor crisis ye la moral. Demostrao ta qu’hai riqueza abondo, ye’l repartu lo que tenemos qu’ameyorar.  Les muyeres entamemos la nuesa revolución nel sieglu XX, una revolución pacífica y pacifista, que dende’l primer momentu tuvo como bandera la xusticia social. Propunximos como xera principal reinxertar a les y los “naides” resultantes del agresivu sistema social y económicu qu’adoptemos a finales del sieglu XIX. Llueu llegaron les guerres mundiales y glayemos el nuesu NON rotundu a los enfrentamientos bélicos, non namás poles tráxiquesya inútiles consecuencies, tamién pol nuesu compromisu col diálogu y los alcuerdos de pa, esenciales nel so resolvimientu. Como lisístrates modernes, na llendel’l esperpentu, lleguemos a recurrir inclusive a la güelga sexual, que nel casu de Lliberia foi clave pa la paz. El perenorme númberu d’asociaciones de muyeres pola paz en tol mundiu nun fai otro qu’amosar la nuesa batalla per un mundu ensin violencia, una sociedá feliz.  

Si vis pacem, para bellum tendríase que camudar a Si vis pacem, para pacem.  ¿Cómo? Educando pa la paz, favoreciendo la convivencia pacífica per aciu de valores como la xusticia social, el respetu, la solidaridá, la interculturalidá. Educamos na competitividá, cola consiguiente frustración y sensación de fracasu nel nuesu alumnáu, ciudadanes y ciudadanos del futuru. ¿Por qué asignatures como Filosofía o Valores Éticos nun son les más importantes del currículu? Son de les poques que conviden a la reflexón, al alderique, al diálogu, aiciones pernecesaries nestos tiempos tan tecnolóxicos onde la interaición social súmese y la gafa individualidá aumenta.

Xunto a la educación, sigamos esixendo a los gobiernos lleis y soluciones polítiques que miren pol bienestar común.  Aníbal Quijano dicía que “la idea de raza ye, de xuru, la más eficaz ferramienta de dominación social inventada nos postreros 500 años”. Tendríamos d’añedir la de clase, y depués etiquetes como’l sexu, la nacionalidá y la relixón qu’inventemos pa estremanos.  Desaposiaos d’esi disfraz social, queda lo importante: el ser humanu, coles sos cualidaes ya imperfecciones. Prautiquemos les que nos honren y ameyoremos les que nos llenden.  A la fin del día, solo queda eso que la pandemia mos aprendió a valorar.

Print Friendly, PDF & Email

Esta entrada está disponible en: Castellano (Castellanu)


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4757

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4757