Home > Condiciones llaborales > 23 hores llectives pa maestros/es yá

23 hores llectives pa maestros/es yá

AMENORGAMIENTU XORNADA LECTIVA CUERPU DE MAESTROS A 23 HORES YÁ

 

 

L’aprobación per parte del Congresu de los Diputaos del Proyectu de Llei de Meyora de la docencia con fecha de 13 d’avientu abre espaciu par dar en la reversión de los retayos impuestos pol Partíu Popular nel ámbitu docente nel añu 2012.

Con esta aprobación, cede a les comunidaes autónomes les competencies correspondientes pa establecer la xornada llaboral del profesoráu, volver a les ratios d’alumnáu per aula anteriores a los retayos y esaníciense los diez díes lectivos d’espera pa la sustitución del personal docente.

La Llei de Meyora establez pal profesoráu de Secundaria una xornada lectiva mínima de 18 hores y pal cuerpu de Maestros encamienta un máximu de 23 hores lectives. N’Asturies, tres dellos cursos de movilizaciones del profesoráu, consiguióse un alcuerdu na Mesa Sectorial d’Educación qu’afita, una vegada aprobada la Llei de Meyora, pal cursu escolar 2019/20, la xornada de 18 hores lectives en Secundaria y l’amenorgamientu de dos hores complementaries nel cuerpu de Maestros. SUATEA consideró na mesa de negociación      esti alcuerdu como un primer pasu na meyora de les condiciones llaborales del profesoráu, yá que recoyía la reivindicación de Secundaria y abría, per primer vegada, espaciu pa falar del horariu lectivu nel cuerpu de Maestros.

Vistu’l nuevu marcu que crea esta Llei y les motivaes reivindicaciones de los maestros énte l’afuegu provocáu polos retayos sufríos estos postreros seis años (aumentu de ratios d’alumnáu, incumplimientu de los alcuerdos de plantiyes, non reposición de personal pa cubrir les baxes por xubilación, falta de desdobles, medría de les xeres burocrátiques, amenorgamientu de recursos humanos y materiales na atención a la diversidá del alumnáu…) ye nesti momentu prioritario ameyorar y dignificar la xera docente de los maestros y maestres amenorgando la so xornada lectiva a 23 hores. Pa qu’esta midida entre en vigor nel cursu 2019/20 tien d’aprobase urxentemente, facilitando asina les acciones organizatives y presupuestaries pertinentes.

Poro, dende SUATEA, esiximos a la Conseyería d’Educación l’apertura inmediata d’una nueva Mesa Sectorial p’alcordar l’amenorgamientu de la xornada lectiva del cuerpu de maestros a 23 hores.

El Secretariáu de SUATEA

Uviéu a 14 d’avientu de 2018

Esta entrada también está disponible en: Castellanu


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 3778

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 3778