22 de febreru. Día Européu pola Igualdá Salarial ente Muyeres y Homes.

Esta entrada está disponible en: Castellano (Castellanu)

El 22 de febreru, “Día Européu pola Igualdá Salarial ente Homes y Muyeres”, tenemos que recordar, como cada añu, la fienda salarial  de xéneru sigue suponiendo una tarrecible realidá en tol Mundu.

Somos les muyeres quien realizamos la práctica totalidá de les xeres de cuidos de menores, dependientes y persones mayores. La mayor parte d’estos cuidos realizase de forma non remunerada y, cuando se trata d’empleos nesti sector, nuna importante proporción en condiciones de precariedá, temporalidá ya inseguridá.

El faese cargu de los cuidos condiciona la elección d’empleos remunerados n’este o otros sectores, siendo les muyeres quien sufrimos mayoritariamente les condiciones de trabayu que traen los empleos parciales o per hores. La doble esplotación qu’esto supón mientres la vida llaboral estiéndese más allá de la edá de xubilación, pos se traduz nuna doble penalización, con unes pensiones que nos conderguen a la probeza na vieyera y, de nuevu, asítiennos en situación de discriminación al respective de los homes.

La diferencia salarial ente homes  y muyeres nun foi erradicada tampoco n’Europa. El tratáu de funcionamientu de la Unión Europea diz: “Cada Estao miembru va garantizar l’aplicación del principiu d’igualdá de retribución ente trabayadores pa un mesmu trabayu o pa un trabayu d’igual valor”.  El mesmu principiu d’igualdá de retribución  taba incluyíu nel Tratáu de Roma yá en 1957. Sicasí, la fienda salarial esiste.

Les midíes correctores tomaes polos Estaos nun son abondos o nun son les fayadices para erradicar la fienda salarial. Les nueses ocupaciones, los sectores nos que trabayamos, el tipu de xornada y contratu que carecemos, l’arrenunciu o l’aplazamientu de la nuesa carrera profesional pa curiar de fíos y fíes, persones dependientes o vieyes y tou un conxuntu de factores sociales, llegales y económicos caltienen, vergonzosamente, la fienda salarial. Inda güei, les muyeres n’Europa, faciendo’l mesmu trabayo que los homes, perciben un menor salariu.

La educación, como única vía pa fomentar    y promover la igualdá, ye l’apueste pa garantizar  la igualdá de tratu y d’oportunidaes de muyeres y homes nel empléu. Precisamos un modelu educativu que, dende la Educación Pública, afite la formación n’igualdá y la coeducación, garantice la permanencia de les neñes y muyeres nueves nel sistema educativu, promueva una orientación non sexista nel accesu a carreres técniques ya impulse l’accesu de les muyeres a cargos de responsabilidá nos centros y l’alministración educativa.

Dende la Organización de Muyeres de la Conferencia Intersindical, esiximos un compromisu social y políticu pa faer cumplir les lleis esistentes y avanzar nel camín que dexe que nun futuru cercanu, la fienda salarial ente home y muyeres sía una mal alcordanza pa les neñes y neños de la mañana.  

Print Friendly, PDF & Email

Esta entrada está disponible en: Castellano (Castellanu)