1º Mayu. Parar los recortes, la corrupción y la represión

Pan, Trabayu, Techu

Parar los recortes, la corrupción y la represión

Volvemos a pasar pel Primeru de Mayu siendo conscientes de que, cada día, ta na cai y na movilización el futuru de la xente, de los pueblos, de la clase trabayadora.

Siguimos enfrentándonos a los abusos del capital, que tienen nes marionetes que mos gobiernen, desde la Unión Europea, dende’l Reinu d’España y dende’l Principáu d’Asturies el so meyor aliáu pa siguir imponiendo les condiciones pal emprobecimientu de la clase trabayadora.

Somos tamién conscientes del trabayu que tenemos delantre y de la so trascendencia, pa siguir sensibilizando sobre lo que mos vien encima, pero tamién de la necesidá de siguir caleyando peles cais, los centros de trabayu y les conciencies, vía más efectiva p’atacar a quien mos ataquen.

Tán quitándonos too, y amás vemos, con munchu esmolecimientu, cómo medra’l númberu de persones per baxo l’umbral de probitú. Esto quier dicir vivir en condiciones de probitú enerxético, ensin trabayu, y munches veces ensin techu… y ensin pan. Al mesmu tiempu sigue dándose la precarización del trabayu, poles fórmules de contratación y pola eliminación de derechos llaborales. Vemos cómo los servicios públicos privatícense o directamente zárrense. Vemos cómo amagosten les sos corrupteles con nueves normas fiscales que toleren, llegalicen y afalen les práctiques de fraude fiscal qu’ellos mesmos practiquen. N’Asturies, asistimos a la quiebra d’un modelu políticu-sindical basáu nel usu indecente de los fondos europeos pa mantener una rede clientelar cola que fabricar mayoríes electorales que permiten mantener el gobiernu asturianu de forma casi continua desde hai más de trenta años.

Toos estos ataques tienen consecuencies directes y pergraves sobre la escuela pública, tanto sobre los sos trabayadores como sobre estudiantes y families. L’aplicación de la LOMCE, auténtica contrarreforma educativa, xunta los recortes de los gobiernos central y asturianu en forma de xuba de ratios y de xornada llectiva, y mengua de medios pa l’atención a la diversidá, repercuten negativamente na calidá del enseñu d’una xeneración condergada, amás, a la emigración y a la precariedá. La llucha pola escuela pública ye güei más que nunca la llucha pol futuru de la mocedá asturiana.

Llevamos también cuantayá dando a conocer y lluchando pa tornar esti nuevu ataque a les ciudadanes y ciudadanos (el TTIP -Alcuerdu Tresatlánticu de Comercio e Inversión-), que ta cocinándose desde les altes instituciones europees y norteamericanes, ensin la mínima participación de los parlamentos nacionales: TTIP, el CETA (ente la UE y Canadá) y el TISA (alcuerdu multilateral ente 50 países sobre’l comerciu de Servicios). L’horizonte que s’abre d’aprobase esta barbaridá apunta directamente a la privatización de servicios básicos pa la ciudadanía, como ye l’enseñu. Si la UE y la moneda única son el corsé neolliberal, el TTIP ye’l potru de tortura.

Too ello xunto supón un verdaderu ataque escontra los derechos y llibertaes de la ciudadanía y la xente trabayador y escontra la soberanía de los pueblos.

Al mesmu tiempu tán acabantes d’aprobar una llei, la Llei de Seguranza Ciudadana, conocida como Llei Mordaza, cola que pretenden, pela vía de la represión y l’amenaza, tenenos callaos y en casa. Una llei que pervierte’l sistema, suprimiendo llibertaes y derechos fundamentales.

A cambiu, el nuestru compromisu y la nuestra llucha sigue renovándose y garrando fuercia a golpe de DIGNIDÁ y de CAI. Güei, ensin dulda, el nuestru mensaxe llénase de sentíu, y ye’l compromisu qu’asumimos: Pan, trabayu, techu. Parar los recortes, la corrupción y la represión. Y la forma de facelo respuende a una proclama social milenta veces repetida nes places dende’l 21-M: “La cai ye l’únicu camín pa que los cambios seyan reales, pa qu’hebia una verdadera tresformación social”.