Home > Comunicaos > 1ª Propuesta de plantiyes docentes: Los retayos nun reculen

1ª Propuesta de plantiyes docentes: Los retayos nun reculen

La Conseyería d’Educación publicó la 1ª propuesta de plantiyes del profesoráu asturianu pal próximu añu. La promesa de que n’Asturies se van a revertir los retayos y que vamos superar el contestu de crisis queda namás nuna declaración d’intenciones. Na propuesta presentada nun s’acolumbra apenes recuperación y destaca l’amenorgamientu significativu de la Educación Infantil, cola perda de 9 places de plantiya, que se sumen a la esmolecedora cifra de 29 del cursu pasáu y ello magar la continua demanda de necesidaes de profesoráu d’apoyu que se vien faciendo dende los centros educativos.

Dende distintos ámbitos de la comunidá educativa yá denunciemos el zarru d’unidaes en 3 años y les consecuencies qu’esto tien nos centros públicos: la perda d’un aula al entamu de la escolarización va dir amenorgando consecutivamente la de los cursos que lu siguen hasta dexar na metá a gran parte de les escueles afectaes. Produzse un efectu dominó que desmantela la Escuela Pública mientres se caltien l’espilfarru subvencionando con dineru público los centros privaos por aciu conciertos. Nun valen pa nada les declaraciones del Sr. Conseyeru, que se presenta como cabezaleru de la Enseñanza Pública, cuando na práctica ta emplegándola como subsidiaria de la concertada, nun apostando, nin siquier, pol caltenimientu de lo que yá hai. De nada val tampoco la reconocencia y presto que xenera la Escuela Pública, onde la diversidá d’actividaes y la innovación son conocíes inclusive fora de la comunidá educativa pola repercusión social que tienen. ¿Qué mayor implicación puede pidise al profesoráu? ¿Nun merez l’alumnáu la oportunidá d’ameyorar les sos condiciones d’escolarización cola baxada de la ratio y la esistencia d’apoyos nel aula? Atopamos con polítiques d’aforru, que nieguen la posibilidá d’ameyorar la calidá aplicando criterios d’axuste que siguen na llinia d’estrumir a un profesoráu que realiza’l so trabayu nunes condiciones que son de les más precaries de tol Estáu (véase sueldu y horariu llectivu).

Per otra parte, llama l’atención que nos centros de Secundaria nun se contempla la importante medría de plantiya que tien de suponer l’amenorgamientu de la xornada llectiva a 18 hores, que la so aplicación pa 2019/20 ta roblada con toles Organizaciones Sindicales en Mesa sectorial. Tampoco nel cuerpu de maestros se ve nenguna medría significativa de la plantiya cola qu’encarar l’amenorgamientu de la xornada llectiva demandada por toles organizaciones de la Xunta de Personal Docente y pol parlamentu estatal. Tamién ye llamativo que s’amorticen 5 places de plantiya del profesoráu d’apoyu al ámbitu sociollingüísticu y 8 del ámbitu científicu-técnicu cuando les necesidaes d’atención a la diversidá aumenten cada añu.

A última hora, preséntase una propuesta de plantiya que, llueñe d’apostar pola Escuela Pública, sigue sacrificándola, torgando la estabilización del personal nos centros, negando la posibilidá de desdobles y dexando, a última hora, al profesoráu solo a la de caltener con gran voluntarismu la calidá que precisen y merez la nuestra mocedá. Con esta propuesta de plantiyes nun s’acolumbra nel futuru próximu nenguna señal que suponga la meyora de la situación llaboral del profesoráu asturianu nin de la calidá educativa.

El Secretariáu de SUATEA

N’Uviéu a 11 d’avientu de 2019

Esta entrada también está disponible en: Castellanu


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4339

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4339