17 de Mayu. Día contra la Homofobia

Nos últimos años viénse consolidando la conmemoración del 17 de Mayu como Día Mundial contra la Homofobia, un fechu que, probablemente, sosprienda a quien lo ve dende la distancia heterosexual o cis-sexual ¿qué ye, que la población LGTBI nun cunta yá col 28 de Xunu como xornada para dar a conocer les sos reivindicaciones? ¿Por qué ye necesaria esta nueva fecha nel calendariu conmemorativu? ¿En qué pueden estremase una d’otra?

Vamos empezar con un datu sorprendente: el 17 de Mayu entamó a conmemorase yá en plenu sieglu XXI, a partir d’una iniciativa coordinada dende Francia pol académicu Louis-George Tin nel añu 2005. Nesa fecha institucionalizóse un Comité Internacional contra la Homofobia que poco dempués amplió’l so ámbitu escontra la Transfobia y la Bifobia. Esta Comisión, conocida tamién poles sos sigles n’inglés IDAHO (International Day Against Homophobia), señaló la necesidá de lluchar pa erradicar les conductes y comportamientos de calter homófobu esistentes na sociedá.

Pue resultar más sorprendente tovía saber que la fecha escoyida, el 17 de mayu, nun se debe al azar. Foi nesi día del añu 1990 cuando la Organización Mundial de la Salú (OMS) suprimió la considerancia d’enfermedá mental pa lo que se denominaben hasta entós “comportamientos homosexuales”.  Dicho d’otra manera, gais y lesbianes nun tábemos afectaos/ aes hasta esi momentu por  una especie de llocura inesplicable. En realidá, toa esta llucha empezara en décades anteriores, cuando dellos miembros de la American Psychiatric Association (APA) empezaron a denunciar l’arbitrariedá que suponía la considerancia d’enfermedá mental pa calificar los comportamientos homosexuales. Abrióse un intensu alderique ente la comunidá de psiquiatres y psicólogos/es que nun llegó a nengún alcuerdu sobre la cuestión. Nun yera un asuntu científicu sinón ideolóxicu y solo pudo resolvese per aciu d’un referéndum ente’l conxuntu de l’afiliación, que decidió, por una mayoría xusta, que nun se trataba d’una enfermedá mental, pasu primeru pa que’l conceutu fuera retiráu del DSM, el manual utilizáu pola Psiquiatría pa la catalogación de trestornos mentales.

Asina,  hasta fai bien pocos años, la población LGTBI tuvo sometida a un procesu de medicalización del que se foi llibrando nes últimes décades, anque non na so totalidá. Tovía güei, el colectivu transexual tien que facer frente a la consideración de patoloxía y disforia de xéneru. Si daqué demostró esti procesu foi’l fechu de que munches de les actitúes y comportamientos respondíen a una serie de prexuicios de calter ideolóxicu esistentes na parte heterosexual de la sociedá. Esta llucha treslladóse a la OMS pero hebo qu’esperar dos décades pa llograr el resultáu esperáu dende’l movimientu social LGTBI.

Nel desarrollu d’esti procesu va ser fundamental la ellaboración del conceutu de homofobia, nes sos distintes variantes de transfobia, lesbofobia o bifobia, porque dexó analizar les distintes formes d’opresión sobre la población LGTB. Tratar d’un neoloxismu qu’empezó a emplegase a últimos de la década de los años sesenta del sieglu pasáu. Esto  significa’l refugu , irracional na mayoría de les ocasiones, escontra la homosexualidá nes sos distintes variantes. Inclúyese equí un ampliu catálogu de posibilidaes: refugu, repunancia, agresiones verbales y físiques, hasta llegar al asesinatu. Hai homofobia nos círculos d’amistaes, nes families, nos centros de trabayu, en bona parte de les estructures sociales.

Combatir esos elementos dio datos perimportantes de cara a la normalización social del colectivu LGTB, sobre too si s’observen dende la perspectiva del respetu a les diferencies y l’igualdá de derechos, anque bien desemeyaos, si s’analicen los entornos nos que se llograron avances y se comparen colos otros llugares nos que se caltienen niveles importantes d’opresión.

Esiste una diferencia fundamental ente’l 28 de xunu, Día Internacional de llesbianes, gais, transexuales y bisexuales, y el 17 de mayu, Día Mundial contra la Homofobia. Nel primeru trátase d’una manifestación de visibilidá d’una comunidá negada, invisibilizada y primida y nel segundu, plantégase una llucha pa erradicar les distintes actitúes de refugu y aversión escontra la diversidá al respective les distintes minoríes sexuales esistentes na sociedá. Tratar d’acabar con un discursu opresivu y escluyente.