Home > Comunicaos > Celáa nun esclaria dafechu l’entamu’l cursu 20/21

Celáa nun esclaria dafechu l’entamu’l cursu 20/21

Celáa sigui creando más incertidumes que certeces en relación col entamu’l cursu escolar 2020/21

Pa la Confederación de STEs, de la que forma parti SUATEA, l’ausencia de ratios definíes, la insuficiencia de financiamientu, la falta de concreción tocante al destín de los 2.000 millones que se tresfieren a la educación y l’incumplimientu permanente de les sos obligaciones col profesoráu certifiquen que la Ministra Celaá ye yá un llastre para la enseñanza pública y pal so propiu gobiernu.

Esta cuarta Conferencia Sectorial d’Educación desque se proclamó l’Estáu d’Alarma, que celebraron güei el Ministeriu d’Educación y les Conseyeríes de les Comunidaes Autónomes apurrió dalguna novedá, munches incertidumes, la insolidaridá de dos Comunidaes Autónomes y la constatación, una vegada más, que l’actual Ministeriu d’Educación y Formación Profesional nun ye capaz d’establecer criterios claros y permanentes que sían asumíos poles Comunidaes Autónomes que como recordó la mesma Ministra- caltienen les competencies n’educación, polo que, nuna xestión, cada vez más al debalu, va proponiendo socesives midíes que son modificaes a un ritmu vertixinosu. La novedá de la xunta de güei refierse al alcuerdu alcanzáu coles Conseyeríes d’Educación de les distintes Autonomíes, cola esceición de la Comunidá de Madrid y el País Vascu, nel que s’establecen 14 puntos pal desenvolvimientu del próximu cursu, qu’inclúin aspeutos positivos como son la vuelta a l’actividá lectiva presencial, l’entamu y el desenvolvimientu del cursu nes sos feches habituales, planes de siguimientu pal alumnáu con mayores déficits educativos, trabayu cooperativu, l’amenorgamientu de la fienda dixital y -como nun puede ser d’otra manera- el compromisu de siguimientu de los encamientos sanitarios establecíos nel Real Decretu llei 21/2020 de 9 xunu que faen referencia al caltenimientu de la distancia de seguridá nos centros educativos, l’usu del mázcaru o la llimpieza y procesu de desinfección de los centros educativos. Sicasí, a la de concretar les midíes qu’establez esti Real Decretu, empiecen los problemes. Pa caltener la distancia de seguridá de 1,5 metros que s’establez dende 5º de primaria, ye necesario amenorgar el númberu máximu d’alumnes y alumnos que puedan tar na mesma aula. Eso suón, quiera la Ministra o non, amenorgar les ratios. Con éses, magar ello, la Sra Celaá señala qu’hai que falar d’agrupaciones flexibles convivenciales  que nun tien nada que ver cola ratio”. Too ello pa amazcarar que la cifra anunciada’l pasáu domingu pol Presidente del Gobiernu para dedicar a les nueves necesidaes educatives, 2.000 millones d’euros, nun ye asgaya p’asegurar el cumplimientu a qu’obliga la citada norma.

Dende SUATEA llevamos  delles selmanes esperando que se faigan públiques les instrucciones del Ministeriu pa plantegar  cuestiones concretes qu’afecten a la planificación del próximu cursu 2020-21. Vemos con prestu’l fechu de que se decidiera priorizar la enseñanza presencial porque entendemos que ye la base dende la qu’hai que partir pa garantizar una verdadera integración social que mengüe les distintes fiendes a les que nos referimos mientres la pandemia.

Agora bien, esmoleznos que los criterios que s’afiten pa la presencia nes aules tean marcaos por criterios económicos y non de garantíes sanitaries. N’efectu, en díes anteriores falar ben d’entamar les aules con ratios de 15 alumnos y alumnes. Güei, sicasí, afitóse esa ratio  en 20. Si les aules siguen apinaes, va ser complicao garantizar que nun se conviertan en nuevos focos d’andanciu.

SUATEA súmase al pidimientu de los STEs-i pa reclamar al Ministeriu qu’estableza un mecanismu normativu qu’asegure que los  recursos estraordinarios de financiamientu se dediquen al únicu tipu d’enseñanza qu’asegura la inclusión de tol alumnáu, la Escuela Pública. Nun puede dexase al caprichu de dalguna Comunidá Autónoma’l destín d’esi dineru, cuando yá demostraron con fechos, que prioricen el negociu de dellos frente a les necesidaes de la mayoría, como ye’l casu de la Comunidá de Madrid. Nesti sentíu, ye especialmente llamentable l’anunciu del so Conseyeru d’Educación d’encetar la programación del próximu cursu ensin tener en cuenta la distancia necesaria de 1,5 metros ente estudiantes y apostar por volver a les aules con “normalidá”. La Ministra Celaá tendría de velar pol cumplimientu de la llegalidá en tol ámbitu educativu y en tol territoriu estatal.

Dende SUATEA apostamos por una medría de plantiyes que garantice’l cumplimientu de los protocolos de seguridá sanitaria. Ye la única opción pa garantizar el cumplimientu de les ratios previstes de la que va poder funcionar como estímulu pa garantizar una meyora de la calidá educativa y desaniciar les faltes producíes nesti anómalu cursu qu’agora termina.

Sentimos que, dempués de dos años de xestión al frente del Ministeriu d’Educación, l’actuación de la Ministra nun tea al altor de les necesidaes. Defraudó al personal interino al incumplir el compromisu qu’el so propiu partíu políticu asumiera cola aprobación de la PNL nel Congresu de los Diputaos en 2017 al respective de les Oposiciones. Defraudó a la representación del profesoráu, a la que fai de menos una vegada sí y otra tamién y que tenemos d’enteranos de les sos iniciatives y resolvimientos al traviés de los medios de comunicación y, agora, ta defraudando al so propiu gobiernu con una xestión que pon n’entredichu el trabayu que, dende otres árees ministeriales, ta llevándose a cabu pa evitar qu’esta crisis la paguen los sectores sociales más débiles y vulnerables.

SUATEA

11 de xunu de 2020.


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4344

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4344