Home > Comunicaos > 15 d’ochobre: día de les muyeres rurales

15 d’ochobre: día de les muyeres rurales

mujer-rural

Si’l papel de la muyer nun ye fácil en nengún ámbitu, ye ensin dulda nel mundu rural onde’l so esfuerzu puede ser mayor. Nesti Día Internacional de les Muyeres Rurales, la Secretaría de la Muyer de SUATEA quier reconocer el so trabayu y faer visible lo muncho que queda por faer en favor de la igualdá.

Les poques meyores que se producieron na igualdá ente home y muyeres, nun se producieron de la mesma manera nel mediu rural y anguaño queremos arreparar en cuestiones de salú y curiaos de les muyeres del ámbitu rural dende una perspectiva de xéneru.

La patriarcalización esiste tamién en materia sanitario, muyeres y homes que sufren una mesma enfermedá pueden presentar síntomes distintos y pueden responder diferencialmente a les melecines y a los tratamientos. Malapenes un apunte, “nun tener en cuenta que los síntomes d’infartu de miocardiu nes muyeres pueden ser distintes que nos homes tuvo de resultes que se convirtiera na primer causa de mortalidá ente’l sexu femenino” como señala Mariola Olcina Alvarado.

Por ello queremos asoleyar les desigualdaes  de les muyeres en materia sanidá qu’inclúin, ente otres, la invisibilidá de los nuesos problemes de salú, la escesiva medicalización d’aspeutos de la nuesa vida cotidiana y la falta de canales de participaciónn. Toes estes desigualdaes acentúense, más entá nel mediu rural, pola fragmentación de los sos llugares de trabayu, la insuficiente asociación y l’alloñanza, en munchos casos, de los centros sanitarios.

Falar de salú nes  muyeres nun puede ser namá l’intentu de control de procesos biolóxicos como la maternidá, l’embaranzu, la menopausia o los ciclos menstruales. Les polítiques de salú de les muyeres tienen de desenvolver dafechu los sos derechos y promover la so incorporación a una acción colectiva, participando en tomar de decisiones polítiques qu’afecten a cambeos ambientales y de los servicios de salú.

Son necesaries acciones concretes  pa la salú y curiaos  de les muyeres nel ámbitu rural: Concienciación de les muyeres sobre’l derechu que tienen a decidir na so salú; Participación de les muyeres rurales en tomar decisiones sobre les práctiques en materia sanitario y de cambéu climáticu; necesidá d’invertir recursos ya infraestructures afechos a les necesidaes y percepciones de les muyeres rurales; compartir en planu d’igualdá colos homes les xeres del cuidu de la salú na familia. D’últimes, aplicar les suxerencies de los colectivos de muyeres rellacionaes cola salú nel mediu rural.

El secretariado se SUATEA

14 d’ochobre de 2016

Esta entrada tamién se puede consultar en: Castellanu