Maltratu salarial al profesoráu asturiano

El profesoráu asturiano, igual que’l restu los trabayadores por cuenta ayena, vive del so salariu que recibe nel so casu por educar al alumnáu. El salariu, como’l de tol funcionariáu, compónse d’una parte básica (retribuciones básiques) qu’históricamente yera la fundamental p’atender a les sos necesidaes de sobrevivencia y, otra complementaria (retribuciones complementaries) que como’l so nome indica taben destinaes a completar les básiques. Sicasí, paradóxicamente, les complementaries suponen más del 50% del so salariu a lo llargo de tola vida llaboral.

Les retribuciones básiques (sueldu base y trienios) son competencia esclusiva estatal y fíxense tolos años nos presupuestos del Estáu. Les complementaries (Complementu de Destín, Complementu Específicu y Productividá) son competencia autonómica.

Nel ámbitu estatal sufrimos el primer maltratu. Dende 2010 llevamos aguantando una devaluación salarial constante. El gobiernu del expresidente Zapatero aplicó un retayu d’ente’l 5%-7%. Si a ello-y sumamos la xubida acumulada del IPC dende xineru de 2010 hasta avientu de 2018 (un 12.8%, según el INE), la conxelación salarial hasta’l 2016 y, amás, les ínfimes xubes salariales del 2016, 2017 y 2018 (del 1%), resulta que la cuesta que vamos tener que xubir pa recuperar los nuesos salarios a feches anteriores al añu 2010 varia ente’l 16 y el 17%.

Cola aprobación l’añu pasáu del RD 24/2018 (consecuencia del II Alcuerdu sobre Meyora del Empléu Públicu robláu poles centrales sindicales CCOO, UXT Y CSIF), establezse una xuba salarial fixa pal añu 2019 d’un 2,25% al respective la remuneración de 31 d’Avientu de 2018. A esta medría porcentual, cabe suma-y un 0,25% variable que s’aplicaría el 1 de xunetu de 2019, siempres qu’el PIB algamara un aumentu del 2,5% l’añu anterior (2018). La medría del PIB del 2018 foi del 2.4%, inferior polo tanto al 2.5%. En consecuencia, el complementu del 0,25% va esperimentar una reducción proporcional a esa merma. En resume: anguaño va xubísenos el sueldu un 2,45%, cifra mui lloñe de la recuperación salarial pa la que sería menester aumentar el salariu nun 16% aproximao.

Nel ámbitu asturianu, el castigu ye entá mayor. Mientres que n’otros territorios s’emplega’l Complementu Específicu del salariu pa compensar los recortes impuestos pol PP al traviés de complementos de calter autonómicu, n’Asturies ye’l más baxu de tol Estáu: 518 € frente, por exemplu, a los 742€ de Cantabria. Ello trai como consecuencia que los sueldos del profesoráu con menos de cinco años d’antigüedá seyan los más baxos del Estáu na enseñanza Secundaria y los terceros más baxos nel cuerpu de Maestros (ver tabla comparativa) pudiendo llegar a perpasar el 15% la diferencia retributiva. Creáu esti erial salarial yá dende’l 2010, la Conseyería Educación cola collaboración de los sos sindicatos amigos, ufiertaron como “tabla salvación” al afuegu salarial, el xantaxe d’un incentivu salarial a cambiu de sometese a una bufa evaluación del desempeñu docente que nengún de los otros territorios sufre y, qu’ensin embargo, tienen pagues equivalentes o incluso mayores. Amás d’esti agraviu comparativu con otros territorios, esti incentivu discrimina tamién a les persones que se punxeron males (esti cursu 176 persones fueron declaraes non evaluables) y a aquelles con menos de 5 años de serviciu prestaos n’Asturies que nun tienen accesu a esti incentivu.

A tolo dicho, sumemos un abusu más. Los sindicatos collaboracionistes pactaron cola Alministración asturiana qu’un 0.6% de la masa salarial de los empleaos públicos asturianos se destinare a un “Plan de Pensiones de Empleo” soscritu con una aseguradora privada (CASER). Derivóse asina parte del salariu de cada trabayador/a a la especulación bancaria. L’aportación alministrativa a esti plan yá fue suspendida colos recortes y munchos emplegaos siguieron aportando perres al plan viendo como esti últimu añu sufrieron pérdides d’un 4,31%.

Ante esti maltratu salarial, col envís non namás de recuperar, sinón d’ameyorar los nuesos salarios, dende SUATEA esiximos:

– Xuba llinial nel Complementu Específicu (competencia asturiana) pa toos y toes qu’igüe la perda de la masa salarial d’estos últimos años ensin sometela a nenguna condición (plan d’evaluación docente).

–  Xuba salarial estatal del 17% que mos permita recuperar lo perdío.

– Dempués d’algamada la recuperación, una meyora añal del poder adquisitivu con xubes salariales superiores al IPC.

El Secretariáu de SUATEA

Uviéu a 11 d’abril de 2019.