Home > Comunicaos > 11 d’ochobre: día internacional de les neñes

11 d’ochobre: día internacional de les neñes

11 D’OCHOBRE: DÍA INTERNACIONAL DE LES NEÑES

Dende la Organización de Muyeres queremos sumanos a la celebración del Día Mundial de les Neñes, entendiendo qu’esti día tien que valir pa  llamar l’atención de los estaos y organismos internacionales y secudir les conciencies de la ciudadanía. La situación de les neñes en munchos llugares del mundu ye crítica y va ser imposible algamar el progresu de la humanidá si se mira pa otru llau y nun se tomen midíes urxentes a escala global.

Les neñes sufren de base una doble discriminación: son menores y son muyeres. Munches vegaes, estes dos facetes vienen xuníes a otres como l’orixe, la relixón, y la probitú, que faen medrar entovía más les desigualdaes. En países en víes de desarrollu, munches son vistes como un mediu que tien la familia pa menguar les sos penes, lo que fai que a 1 de cada 7 neñes menores de 15 años les casen a la fuerza; según les Naciones Xuníes, solo anguaño, van casase 12 millones de muyeres de menos de 18 años. A la vez, la OMS alerta que, cada añu, más de 3 millones de neñes tán en riesgu de ser víctimes de mutilación xenital femenina, medrando la cifra estimada de 200 millones de neñes y muyeres vives que la sufrieron. Por si esto yera poco, les redes de tráficu de persones cébense na vulnerabilidá de les nueses neñes, que pasen a arriquecer los bolsos de mafies de prostitución qu’actúen impunemente y ensin fronteres.

Ensin dulda, l’enfotu tien de ponese na importancia del derechu a la educación de les neñes como garantía del so apoderamientu y emancipación. Dende’l 2013, el númberu de neñes escolarizaes nel mundu va menguando, lo que tendría de ser considerao como una auténtica catástrofe y, por mor d’ello, tratao con urxencia máxima d’un mou coordináu polos organismos internacionales.

El patriarcáu ye implacable nel so enfotu por perpetuar los estereotipos, los roles y les desigualdaes de xéneru y exerce la so presión más brutal sobro les moces p’amoldales a los sos intereses, desaniciándo-yos drechos y llibertaes. Poro, la OM esiximos que se protexa a les neñes de tol mundu ensin sides y ensin posa porque son el futuru, porque elles merecen vivir una vida meyor, porque van ser el motor de la nuesa llucha futura.

 

11 d’ochobre de 2018

Organización de Muyeres Ci. Secretaría de la muyer de SUATEA

Esta entrada también está disponible en: Castellanu


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 3743

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 3743