Home > Muyer > 11 de febreru. Día Internacional de la Muyer y la neña na Ciencia

11 de febreru. Día Internacional de la Muyer y la neña na Ciencia

La Organización de Muyeres de la Confederación Intersindical quier conmemorar el 11 de febreru, el Día Internacional de la Muyer y la neña na Ciencia, día proclamáu pola Asamblea Xeneral de les Naciones Xuníes en 2015 col fin de llamar l’atención de la comunidá internacional sobre la grave fienda de xéneru qu’afecta a la ciencia. A pesar de ser una prioridá pa munchos países ya instituciones polítiques internacionales, la meyora de les muyeres y les neñes na ciencia non solo s’estancó, sinón qu’empezó a recular.

La fienda de xéneru nos sectores de la ciencia, la tecnoloxía, la inxeniería y les matemátiques (STEM) persiste dende va años en tol mundu. Anque les muyeres llogren más del 50% de los títulos universitarios, la so presencia en carreres como física o inxeniería nun llega al 30%. Les científiques d’anguaño aseguren que sigue la discriminación, que la sociedá caltién bien vivos los condicionantes de xéneru y que los puestos de gobiernu son prácticamente inaccesibles pa elles.

Esta presencia menguada de la muyer respuende a distintes razones sociales: la poca visibilidá de les científiques -anque que munches d’elles tuvieron involucraes en grandes descubrimientos-; la falta de roles femeninos -la imaxe de los científicos ye prioritariamente masculina- y l’esistencia d’estereotipos -concencia social de que les muyeres nun valimos pa la ciencia – producen sesgos involuntarios na evaluación de los méritos de les muyeres y pocu interés nes ciencies per parte les nueves.

Ye menester apoderar a les muyeres y neñes per aciu del accesu a la educación y la ciencia, pos les muyeres son necesaries pa contribuyir al desarrollu del progresu nel mundu. Nuna dómina na que la mayor parte los retos que se nos presenten dependen de la Ciencia y la Tecnoloxía, nun podemos permitimos nun contar col talentu de la metá de la población.

Pa ello faen falta intervenciones, ferramientes de polítiques y programes enfocaos pa camudar les prioridaes, inversiones y percepciones de los sectores públicu y privau en relación al llugar de les muyeres y les neñes na Ciencia, Tecnoloxía ya Innovación (CTI)

Un puntu de partida sedría desterrar la imaxe que se da de los científicos y los innovadores nos medios sociales, los llibros de testu y la publicidá, que ye predominantemente masculina. Que les neñes tengan referentes, que conozan y aprecien les aportaciones de les muyeres na ciencia.

Por ello, la Organización  de Muyeres de la Confederación Intersindical considera importante conmemorar esti día, visibilizar  el llabor de les científiques, fomentar vocaciones científiques nes neñes col envís d’ayudar  a cerrar la fienda de xéneru en ciencia. Llegó’l momentu de sofitales ya invertir nelles.

 

Uviéu, 11 de febreru de 2019

 

La Organización de Muyeres de la Confederación Intersindical

Esta entrada también está disponible en: Castellanu


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 3778

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 3778