Home > Comunicaos > 1 d’ochobre día de les Neñes.

1 d’ochobre día de les Neñes.


1 d’ochobre día de les Neñes. “La mio voz, el nuesu futuru de mancomún”

A propuesta de Naciones Xuníes y dende 2011, el 11 d’ochobre conmemora’l día de les neñes a nivel mundial.

Con esta conmemoración preténdese visibilizar y denunciar la discriminación y abusos que sufren les neñes pol simple fechu de selo. La mutilación xenital femenina, los matrimonios forzaos de neñes, la  trata con fines d’esplotación sexual, l’ausencia d’escolarización o l’abandonu tempranu son dalgunos d’estos abusos. La conmemoración pretende solmenar la conciencia social y de pasu esixir a los gobiernos midíes de proteición pa estes menores en situación de vulnerabilidá.

Según Naciones Xuníes, en tol mundu casi 1 de cada 4 neñes d’ente 15 y 19 años nun ta emplegada, nin estudia o recibe capacitación, en comparanza con 1 de cada 10 neños de la mesma edá. Pa 2021, alredor de 435 millones de muyeres y neñes van vivir con menos de 1,90 $ al día, incluyendo los 47 millones resultantes de la COVID-19.

Esta Pandemia global afeuta sobremanera a les persones más vulnerables y nesta situación s’atopen les neñes. La campaña mundial pola escolarización de les neñes viose atayada por esta pandemia, lo que puede llevar a un retrasu importante na so formación y, polo tanto, nes sos oportunidaes d’apoderamientu. Agora mesmo, por efeutu de la crisis sanitaria, hai 10 millones de neñes y neños ensin escolarizar. Cada vez ye más difícil consiguir la so torna a les aules, porque les necesidaes económiques de les families amontaes pola crisis obliguen a estes criatures a trabayar.

Les neñes sufren doblemente, pol puru fechu de selo. Tenemos de lluchar pa da-yos un futuru meyor, tenemos de trabayar pol so apoderamientu, pa que tengan la oportunidá d’ameyorar les sos condiciones. Y la meyor oportunidá de toes ye la que la brinda la educación. Dende la nuesa posición privilexada tenemos d’esixir a los gobiernos de tol mundu que velen poles nueses neñes, por toes, pero sobremanera poles más vulnerables. Que se retome la so escolarización allá onde entá nun se fixo, que s’establezan lleis contra los abusos a los que tán sometíes y que se les protexa.

Les neñes son el nuesu futuru: “el mundu alluga a más de 1.100 millones de neñes menores de 18 años que tán preparaes pa convertise na xeneración más grande de muyeres cabezaleres, entamadores y promotores del cambéu que’l mundu viera”. ONU Muyeres

El lema d’anguaño ye “La mio voz, el nuesu futuru de mancomún”, dende la Organización de Muyeres de la Confederación Intersindical vamos collaborar en da-yos voz pa que puean:

•             Vivir llibres de la violencia por razón de xéneru, de les práctiques nocives, del VIH y el sida. 

•             Aprender nueves habilidaes pa optar a un futuru de la so eleición.  

•             Dirixir una xeneración d’activistes p’acelerar el cambéu social.

11 d’ochobre 2020

Organización de Muyeres CI

Secretaría de la Muyer – SUATEA



Esta entrada también está disponible en: Castellanu


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4344

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4344